తిరుమలలో ఏనుగుల గుంపు సంచారం

దిశ, వెబ్ డెస్క్ : తిరుమలలోని (Tirumala) పాపవినాశనం మార్గంలో గజరాజుల (Elephants) సంచారం కలకలం రేపింది. శేషాచలం (Sesachalam) అటవీ ప్రాంతం నుంచి వచ్చిన ఏనుగుల గుంపు, శ్రీవారికి అత్యంత ప్రీతిపాత్రమైన పార్వేట మండపం సమీపంలో ప్రత్యక్షమైంది. ఈ గుంపులో పదికి పైగా ఏనుగులు ఉన్నట్లు అటవీశాఖ అధికారులు గుర్తించారు. ఏనుగులు అటవీ మార్గం నుంచి ఒక్కసారిగా రహదారిపైకి రావడంతో అటుగా వెళ్తున్న వాహనదారులు, స్థానికులు తీవ్ర భయాందోళనలకు గురయ్యారు. సమాచారం అందుకున్న అటవీశాఖ సిబ్బంది (Forest Guards) వెంటనే రంగంలోకి దిగి, టపాసులు పేల్చుతూ, శబ్దాలు చేస్తూ ఆ గజరాజుల గుంపును జనసంచారం లేని దట్టమైన అడవిలోకి దారి మళ్లించేందుకు తీవ్రంగా శ్రమించారు.

భక్తుల భద్రతను దృష్టిలో ఉంచుకుని తిరుమల తిరుపతి దేవస్థానం (TTD) అధికారులు తక్షణమే అప్రమత్తమయ్యారు. పాపవినాశనం, ఆకాశగంగ, జాపాలి తీర్థాలకు వెళ్లే మార్గాల్లో భక్తుల రాకపోకలను తాత్కాలికంగా నిలిపివేశారు. అడవి నుంచి ఏనుగులు పూర్తిగా వెనుతిరిగే వరకు ఈ ఆంక్షలు కొనసాగాయి. అటవీశాఖ సిబ్బంది నిరంతర నిఘా ఉంచి, ఏనుగుల గుంపు సురక్షితంగా అటవీబాట పట్టినట్లు ధృవీకరించిన తర్వాతే టీటీడీ మళ్లీ వాహనాలను, భక్తులను ఆ మార్గంలో అనుమతించింది. ప్రస్తుతం పరిస్థితి అదుపులో ఉన్నప్పటికీ, అడవికి ఆనుకుని ఉన్న ప్రాంతాల్లో భక్తులు, వాహనచోదకులు అప్రమత్తంగా ఉండాలని అధికారులు సూచించారు.