భవనాన్ని ఢీకొట్టిన చిన్న విమానం, పైలట్ సహా ముగ్గురు దుర్మరణం
బ్రెజిల్లో ఘోర విమాన ప్రమాదం చోటుచేసుకుంది. ప్రధాన నగరమైన బెలో హారిజోంటేలో సోమవారం ఒక చిన్న విమానం అదుపుతప్పి నేరుగా ఒక నివాస భవనాన్ని ఢీకొట్టి కుప్పకూలింది.
దిశ, డైనమిక్ బ్యూరో: బ్రెజిల్లో ఘోర విమాన ప్రమాదం చోటుచేసుకుంది. ప్రధాన నగరమైన బెలో హారిజోంటేలో సోమవారం ఒక చిన్న విమానం అదుపుతప్పి నేరుగా ఒక నివాస భవనాన్ని ఢీకొట్టి కుప్పకూలింది. ఈ దుర్ఘటనలో పైలట్ సహా మొత్తం ముగ్గురు ప్రాణాలు కోల్పోగా, మరో ఇద్దరు తీవ్రంగా గాయపడ్డారు. ప్రమాదం జరిగిన వెంటనే తీవ్ర ప్రభావం కారణంగా పైలట్, కో-పైలట్ అక్కడికక్కడే మృతి చెందినట్లు మినాస్ గెరైస్ రాష్ట్ర అగ్నిమాపక శాఖ వెల్లడించింది. విమానంలో ఉన్న మిగతా ముగ్గురిని హుటాహుటిన ఆసుపత్రికి తరలించగా, వారిలో ఒకరు చికిత్స పొందుతూ తుదిశ్వాస విడిచారు. ప్రస్తుతం గాయపడిన ఇద్దరు ఆసుపత్రిలో చికిత్స పొందుతున్నారని, వారి పరిస్థితి నిలకడగానే ఉందని స్థానిక ఆసుపత్రి వర్గాలు తెలిపాయి.
ప్రమాదం ఎలా జరిగింది?
అంతర్జాతీయ మీడియా ప్రకారం.. అదే సమయంలో ఆ ప్రాంతంలో ఉన్న టీవీ గ్లోబో (TV Globo) ఛానెల్కు చెందిన వార్తా హెలికాప్టర్ ఈ ప్రమాద దృశ్యాలను కెమెరాలో బంధించింది. ఎత్తు కోల్పోయిన ఆ చిన్న విమానం, ఎత్తైన భవనాలను తప్పించుకునే క్రమంలో వేగంగా ఎడమవైపుకు తిరిగింది. ఆ తర్వాత నేరుగా ఒక మూడంతస్తుల భవనాన్ని ఢీకొని, కింద ఉన్న పార్కింగ్ ప్రదేశంలో పడిపోవడం ఆ వీడియోలో స్పష్టంగా రికార్డు అయింది. విమానం నేరుగా భవనాన్ని ఢీకొట్టినప్పటికీ, లోపల నివసిస్తున్న వారెవరికీ ఎలాంటి గాయాలు కాకపోవడం గమనార్హం. విమానం అపార్ట్మెంట్ పక్క భాగాలను కాకుండా, భవనం మెట్ల భాగాన్ని (stairwell) ఢీకొట్టడం వల్లే ప్రాణనష్టం తక్కువగా జరిగిందని అగ్నిమాపక సిబ్బంది తెలిపారు. ‘ఒకవేళ విమానం భవనం పక్క భాగాలను ఢీకొట్టి ఉంటే, జనం ఉన్న అపార్ట్మెంట్లోకి చొచ్చుకుపోయి తీవ్ర ప్రాణనష్టం జరిగి ఉండేది’ అని ఒక అధికారి G1 న్యూస్ వెబ్సైట్కు వివరించారు.
బ్రెజిల్లో పెరుగుతున్న విమాన ప్రమాదాలు
ప్రమాదం తర్వాత భవనం కుప్పకూలే ప్రమాదం ఏమీ లేదని అధికారులు స్పష్టం చేశారు. భవనం నుంచి స్థానికులను సహాయక సిబ్బంది సురక్షితంగా బయటకు తీసుకువస్తున్న చిత్రాలను అగ్నిమాపక సిబ్బంది మీడియాకు విడుదల చేశారు. ఏరోనాటికల్ యాక్సిడెంట్స్ ఇన్వెస్టిగేషన్ అండ్ ప్రివెన్షన్ సెంటర్ డేటా ప్రకారం.. బ్రెజిల్ దేశవ్యాప్తంగా విమాన ప్రమాదాలు ఆందోళన కలిగిస్తున్నాయి. గతేడాది (2025)లో బ్రెజిల్లో మొత్తం 153 విమాన ప్రమాదాలు జరగ్గా, అందులో 62 మంది మృత్యువాత పడ్డారు. తాజా ప్రమాదం స్థానికంగా తీవ్ర విషాదాన్ని నింపింది.
