ఓ సాధారణ యువతి నుంచి ప్రపంచ సుందరిగా ఓపల్ ప్రయాణం.. నేటితరం యువతకు ఆదర్శం

దిశ, వెబ్ డెస్క్: హైదరాబాద్‌లో తెలంగాణ ప్రభుత్వం అత్యంత ప్రతిష్టత్మకంగా నిర్వహించిన మిస్ వరల్డ్ 2025 (Miss world-2025) పోటీలు శనివారంతో ముగిశాయి. ఈ వేదికపై 108 దేశాల సుందరీమణులు పోటీపడి, ప్రపంచ సుందరి కిరీటాన్ని అందుకోవడానికి ప్రయత్నించారు. ఈ పోటీల్లో 72వ ప్రపంచ సుందరి కిరీటాన్ని థాయ్‌లాండ్‌కు చెందిన ఓపల్ సుచాత చువాంగ్ శ్రీ (Opal Suchata Chuangsri) దక్కించుకున్నారు. ఈ విజయం కేవలం ఆమె పుస్తకంలోని ఓ అధ్యాయం మాత్రమే కాదు, ఆమె జీవితంలోని ఓ సంచలన ఘట్టం. ఎందుకంటే.. ఈ ప్రతిష్టాత్మక అంతర్జాతీయ సౌందర్య పోటీలో విజయం సాధించిన తొలి థాయ్ మహిళగా ఈమె ఈ సందర్భంగా చరిత్ర సృష్టించారు. కానీ, ఈ విజయగాథ వెనుక ఓ దీర్ఘమైన ప్రయాణం ఉంది. చిన్నతనంలో ఎదురైన ఆరోగ్య సమస్యలు, ఆత్మవిశ్వాసానికి తలెత్తిన సవాళ్లు, వ్యక్తిత్వాన్ని తీర్చిదిద్దుకున్న పోరాటాలు – ఇవన్నీ ఓపల్‌ను ఈ గొప్ప క్షణానికి తీసుకువచ్చాయి. ఆమె అందం మాత్రమే కాదు, ఆత్మవిశ్వాసం, ప్రజల పట్ల ఉన్న ప్రేమ, సామాజిక బాధ్యతలు.. ఇవే ఆమెను నిజమైన ప్రపంచ సుందరిగా నిలిపాయి. ఈ సందర్భంగా ఓ సాధారణ యువతి, ఓ అద్భుత ప్రపంచ వేదికను ఎలా జయించిందో తెలుసుకుందాం.

* బాల్యం:

2003 మార్చి 20న థాయ్‌లాండ్‌లోని ఫుకెట్ ప్రాంతంలో ఓ సాధారణ మధ్యతరగతి కుటుంబంలో ఓపల్ జన్మించింది. తండ్రి థనెట్ డోంకామ్‌నెర్డ్, తల్లి సుపత్రా చువాంగ్‌శ్రీ. ఇద్దరూ కూడా ఫుకెట్‌లో ప్రైవేట్ వ్యాపారాన్ని నిర్వహిస్తున్నారు. చిన్ననాటి నుంచే ఓపల్‌కు లోతైన ఆలోచనలు, పరిసరాలపై జాగ్రత్తగల గమనికలు, చురుకైన ప్రవర్తన కలిగి ఉండేది. ఓపల్ విద్యపై అసాధారణ ఆసక్తి చూపింది. మొదటగా చైనీస్ భాషలో డిప్లొమా పూర్తి చేసింది. అనంతరం, థామ్మసాట్ యూనివర్శిటీలో అంతర్జాతీయ సంబంధాలపై B.A. అభ్యసిస్తోంది. ఆమెకు థాయ్, ఇంగ్లీష్, చైనీస్ భాషల్లో ప్రావీణ్యం ఉంది. ఇవి ఆమెను అంతర్జాతీయ వేదికలపై మరింత విశ్వసనీయంగా నిలిపాయి. "తన దేశానికి రాయబారిగా మారాలి" అన్న కలను ఆమె నిశ్చయంగా ఎంచుకుంది.

* ఆరోగ్య సమస్యలు:

16 ఏళ్ల వయసులో ఓపల్ ఛాతీలో గడ్డ (Tumor) ఏర్పడినట్లు వైద్యులు గుర్తించారు. అదృష్టవశాత్తూ అది ప్రాణాంతక కాన్సర్ కాకపోయినా, ఆ అనుభవం ఆమె మనసులో ఎన్నో ప్రశ్నలను, బాధ్యతలను జాగృతం చేసింది. ఈ సంఘటన అనంతరం, ఆమె ఆరోగ్యంపై మాత్రమే కాకుండా, మహిళల ఆరోగ్యంపై అవగాహన కల్పించాలన్న లక్ష్యంతో ముందుకు వెళ్లింది. ఈ ఉద్దేశంతోనే "ఓపల్ ఫర్ హర్ (Opal for Her)" అనే ప్రాజెక్టు ద్వారా రొమ్ము క్యాన్సర్ పై అవగాహన, మహిళా ఆరోగ్య శిబిరాలు, పేద విద్యార్థుల విద్యా సహాయం వంటి కార్యక్రమాలు నిర్వహిస్తోంది.

* విజయాలు:

ఓపల్ 2021లో 'మిస్ రట్టనకోసిన్' పోటీలో పాల్గొని మోడలింగ్ రంగంలోకి అడుగుపెట్టింది. ఆపై 2022లో మిస్ యూనివర్స్ థాయ్‌లాండ్ పోటీలో అత్యంత చిన్న వయస్సు గల పోటీదారుగా పాల్గొని, మిస్ నేచురల్ బ్యూటీ అవార్డు గెలుచుకుంది. ఈ టైటిల్ ఆమె సహజత్వానికి గుర్తింపు ఇచ్చింది.

2024లో మిస్ యూనివర్స్ థాయ్‌లాండ్ కిరీటాన్ని గెలుచుకొని, అదే ఏడాది మిస్ యూనివర్స్ అంతర్జాతీయ పోటీలో మూడవ రన్నరప్ గా నిలిచింది. ఈ గౌరవం ఆమెను ప్రపంచ వేదికపై దృశ్యమానంగా మార్చింది. చివరికి, 2025లో హైదరాబాద్ వేదికగా జరిగిన మిస్ వరల్డ్ పోటీలో 'బ్యూటీ విత్ ఎ పర్పస్' (Beauty with a Purpose) నినాదంతో థాయ్‌లాండ్‌కు ప్రాతినిధ్యం వహించి 108 దేశాల పోటీదారులను అధిగమించి విజేతగా నిలిచింది.

ఇక జీవితంలో ఎన్ని ఒడిదుడుకులు ఎదురైనా ఓపల్ మాత్రం వాటిని ధైర్యంగా ఎదుర్కొంది. పట్టుదలతో ప్రతి అడ్డంకిని తన బలంగా మలచుకుంది. చిన్న చిన్న విషయాలకే కుంగిపోయే ఎంతో మంది నేటితరం యువతకు ఆదర్శంగా నిలిచింది.