ఉస్మాన్ హాదీ హత్య వెనుక మహమ్మద్ యూనస్.. సంచలనంగా మారిన వ్యవహారం

దిశ, వెబ్ డెస్క్: బంగ్లాదేశ్‌లో హిందూ మైనారిటీలను లక్ష్యంగా చేసుకుని జరుగుతున్న దాడులపై భారత్ తీవ్రంగా స్పందించింది. మైమెన్‌సింగ్ జిల్లాలో దీపు చంద్ర దాస్ అనే హిందూ యువకుడిని ఉన్మాద మూక కొట్టి చంపడం (Lynching) దేశవ్యాప్తంగా నిరసనలకు దారితీసింది. ఈ ఘటనపై నిరసన వ్యక్తం చేస్తూ ఢిల్లీలోని బంగ్లాదేశ్ హైకమిషనర్‌ను భారత విదేశాంగ శాఖకు పిలిపించి (Summon) తన అభ్యంతరాన్ని వ్యక్తం చేసింది. మరోవైపు, బంగ్లాదేశ్‌లో షేక్ హసీనా ప్రభుత్వం కూలిపోవడంలో కీలక పాత్ర పోషించిన యువనేత శరీఫ్ ఉస్మాన్ హాదీ హత్యతో ఆ దేశంలో అల్లర్లు తారాస్థాయికి చేరుకున్నాయి. డిసెంబర్ 12న ఢాకాలో కాల్పులకు గురైన హాదీ, డిసెంబర్ 18న సింగపూర్‌లో చికిత్స పొందుతూ మరణించడంతో ఆగ్రహించిన నిరసనకారులు వార్తాపత్రిక కార్యాలయాలకు నిప్పు పెట్టారు.

ప్రభుత్వంపై ఆరోపణలు: అస్థిరత కోసమే హత్య..

ఉస్మాన్ హాదీ హత్య వెనుక మహమ్మద్ యూనస్ నేతృత్వంలోని తాత్కాలిక ప్రభుత్వ హస్తం ఉందని ఆయన సోదరుడు ఒమర్ హాదీ సంచలన ఆరోపణలు చేశారు. 2026 ఫిబ్రవరి 12న జరగబోయే సాధారణ ఎన్నికలను అస్థిర పరిచేందుకు, తన సోదరుడి ప్రభావాన్ని అడ్డుకోవడానికే ప్రభుత్వంలోని కీలక వ్యక్తులు ఈ కుట్ర పన్నారని ఆయన పేర్కొన్నారు. ఈ హత్యకు ప్రభుత్వమే బాధ్యత వహించాలని, నేరస్థులను 30 రోజుల్లోగా పట్టుకోవాలని అల్టిమేటం జారీ చేశారు. అయితే, డాక్టర్ యూనస్ ఈ ఆరోపణలను తోసిపుచ్చుతూ హాదీ మృతికి నివాళిగా జాతీయ సంతాప దినాన్ని ప్రకటించారు. ఈ పరిణామాలు భారత్-బంగ్లాదేశ్ సంబంధాలను మరింత క్లిష్టతరం చేస్తున్నాయి.