గల్ఫ్‌ దేశాల్లో గగనతలం మూసివేత.. ప్రయాణికులకు చుక్కలు.. భారీగా విమాన ఛార్జీలు!

దిశ, డైనమిక్ బ్యూరో: ఇరాన్-ఇజ్రాయెల్ మధ్య యుద్ధం ముదురుతున్న నేపథ్యంలో మధ్యప్రాచ్య (Middle East) దేశాల్లో ఉద్రిక్తతలు తారాస్థాయికి చేరాయి. భద్రతా కారణాల దృష్ట్యా గల్ఫ్ ప్రాంతంలోని ప్రధాన దేశాలు తమ గగనతలాన్ని (Airspace) మూసివేస్తున్నట్లు ప్రకటించాయి. మొత్తం 10 దేశాల్లో విమాన రాకపోకలు నిలిచిపోవడంతో అంతర్జాతీయ ప్రయాణికులు తీవ్ర ఇబ్బందులు ఎదుర్కొంటున్నారు. ముఖ్యంగా భారత్ నుంచి అమెరికా, యూరప్ దేశాలకు వెళ్లే వారికి ఈ పరిస్థితి ఆందోళనకరంగా మారింది.

10 దేశాల్లో స్తంభించిన రాకపోకలు..

ఇరాన్, ఇరాక్, బెహ్రయిన్, ఇజ్రాయెల్, జోర్డాన్, కువైట్‌లతో పాటు ఖతార్, సౌదీ అరేబియా, సిరియా, యూఏఈ (UAE) దేశాల్లో విమాన సర్వీసులు నిలిచిపోయాయి. మార్చి 3 వరకు ఈ ఆంక్షలు కొనసాగుతాయని విమానయాన సంస్థలు ప్రకటించాయి. పరిస్థితి విషమించడంతో దిగ్గజ విమానయాన సంస్థలు దుబాయ్ అంతర్జాతీయ విమానాశ్రయం, అబుదాబి (జాయెద్) ఎయిర్‌పోర్ట్, షార్జా విమానాశ్రయాలు, ఎమిరేట్స్, ఎతిహాద్, ఖతార్ ఎయిర్‌వేస్, ఎయిర్ అరేబియా, గల్ఫ్ ఎయిర్ వంటి సంస్థలు తమ సర్వీసులను తాత్కాలికంగా రద్దు చేశాయి. ఎమిరేట్స్ సంస్థ మార్చి 3 మధ్యాహ్నం 3 గంటల వరకు (UAE సమయం) దుబాయ్ సర్వీసులను నిలిపివేసింది. ఇథియోపియన్ ఎయిర్‌లైన్స్ సైతం పలు మధ్యప్రాచ్య దేశాలకు విమానాలను రద్దు చేస్తున్నట్లు ప్రకటించింది.

భారతీయులపై తీవ్ర ప్రభావం.. ఆకాశాన్నంటుతున్న ధరలు!

మిడిల్‌ఈస్ట్ గుండా వెళ్లే మార్గాలన్నీ మూతపడటంతో భారత్ నుంచి యూరప్, అమెరికా వెళ్లే ప్రయాణికులు తీవ్ర అవస్థలు పడుతున్నారు. ప్రత్యామ్నాయ మార్గాలు పాకిస్థాన్, ఆఫ్ఘనిస్థాన్, తుర్కమెనిస్తాన్, కజకిస్తాన్ మీదుగా విమానాలను మళ్లించడంతో ప్రయాణ సమయం భారీగా పెరిగింది. విమాన మార్గాలు మారడం, ఇంధన ఖర్చు పెరగడంతో అంతర్జాతీయ విమాన టికెట్ల ధరలు పెరిగినట్లు తెలుస్తోంది. లండన్ (హీత్రూ), బోస్టన్, గాట్విక్ వంటి అంతర్జాతీయ విమానాశ్రయాల నుంచి వచ్చే సర్వీసులపై కూడా ఈ ప్రభావం పడినట్లు విమానయాన సంస్థలు అభిప్రాయపడ్డాయి.