Pakistani in Jharkhand: వారికి మాత్రం మినహాయింపా? జార్ఖండ్‌లో ఉన్న పాకిస్థానీలు ఇండియాను వదలడంలేదు.. ఎందుకంటే?

దిశ, వెబ్ డెస్క్: Pakistani in Jharkhand: ఏడుగురు పాకిస్తానీ పౌరులు చాలా కాలంగా వీసాపై జార్ఖండ్‌లో నివసిస్తున్నారు. పాకిస్తానీలను వారి దేశానికి తిరిగి పంపాలన్న కేంద్ర ప్రభుత్వ ఆదేశం ఎలాంటి ప్రభావం చూపుతుందో చూడాలి. ఎందుకంటే జార్ఖండ్ లో నివసిస్తున్న ఏడుగురు పాకిస్తానీయులు ఇండియాను వదలడం లేదని.. జార్ఖండ్ పోలీసులు ఒక నివేదికను తయారు చేసి హోం మంత్రిత్వ శాఖకు పంపారు. దీనికి సంబంధించి పూర్తి వివరాలు తెలుసుకుందాం.

పహల్గామ్ ఉగ్రదాడి తర్వాత, కేంద్ర ప్రభుత్వం పాకిస్తాన్‌పై కఠిన వైఖరి తీసుకుంది. భారతదేశంలో నివసిస్తున్న పాకిస్తానీయుల వీసాలను ప్రభుత్వం రద్దు చేసింది. దీనితో పాటు, రాష్ట్ర ప్రభుత్వాలు తమ ప్రాంతాల్లో నివసిస్తున్న పాకిస్తానీ పౌరులను గుర్తించి వారిని తిరిగి వారి దేశానికి పంపాలని ఆదేశాలు జారీ చేసింది. ప్రస్తుతం 10 మంది పాకిస్తానీలు జార్ఖండ్‌లో నివసిస్తున్నట్లు సమాచారం. వీరిలో 7 మంది దీర్ఘకాలిక వీసాపై రాష్ట్రంలో నివసిస్తున్నారు. ఈ ఏడుగురిలో, ఒక పాకిస్తానీ పౌరుడు రాంచీకి చెందినవాడు. ఒకరు హజారీబాగ్ కు చెందినవాడు. ఇద్దరు జంషెడ్పూర్ కు చెందినవారు. మరో ఇద్దరు ధన్బాద్ కు చెందినవారని అధికారులుత తెలిపారు. జార్ఖండ్ పోలీసులు వీరికి సంబంధించిన నివేదికను కేంద్ర హోం మంత్రిత్వ శాఖకు పంపారు.

దీర్ఘకాలిక వీసాపై నివసిస్తున్న పాకిస్తానీలు వివాహం అయినప్పటి నుండి 10-12 సంవత్సరాలకు పైగా రాష్ట్రంలో నివసిస్తున్నారు. కానీ ఒక అధికారి నుండి అందిన సమాచారం ప్రకారం, కేంద్ర హోం మంత్రిత్వ శాఖ ఇటీవలి ఉత్తర్వులో అలాంటి వారికి మినహాయింపు ఇచ్చింది. దీని అర్థం ప్రస్తుతానికి వారు భారతదేశం విడిచి వెళ్లవలసిన అవసరం లేదు. వారు ఇప్పుడు భారత్ లోనే ఉండవచ్చు.

అంతేకాదు రాంచీలోని దొరాండాలో నివసిస్తున్న ఇద్దరు మహిళలకు ముగ్గురు పిల్లలు ఉన్నారు. వారు పాకిస్తానీలు. కానీ ఈ ముగ్గురు పిల్లల తల్లి ఇప్పటికీ భారతీయ పౌరురాలే. ఈ పిల్లలు వారి అమ్మమ్మ ఇంట్లో నివసిస్తున్నారు. వీరిలో ఒక అబ్బాయికి రెండేళ్లు, మిగతా ఇద్దరు అమ్మాయిలకు ఏడు, తొమ్మిది ఏళ్లు. తల్లి భారతీయ పౌరురాలు కాబట్టి, కేంద్ర ప్రభుత్వ ఆదేశం పిల్లలపై అమలులోకి రాలేదు. కానీ ఈ పిల్లల తల్లి, అంటే ఆ ఇద్దరు మహిళలు ఇప్పుడు పాకిస్తాన్ వెళ్ళలేరు. కానీ ముగ్గురు పిల్లలు ఒంటరిగా పాకిస్తాన్‌కు వెళ్లలేరు కాబట్టి వారికి కూడా మినహాయింపు ఇస్తారా అనేది ప్రశ్నార్థకంగా మారింది.

ఒక వేళ పిల్లల తండ్రి సరిహద్దుకు వచ్చి వారిని స్వీకరిస్తే, అప్పుడు మాత్రమే ముగ్గురు పిల్లలను పాకిస్తాన్‌కు పంపగలరు. ఈ కేసులో జార్ఖండ్ పోలీసులు అన్ని అంశాలను దృష్టిలో ఉంచుకుని ఒక నివేదికను రూపొందించి కేంద్ర హోం మంత్రిత్వ శాఖకు పంపారు. ఈ నివేదిక ద్వారా, జార్ఖండ్ పోలీసులు వాస్తవ పరిస్థితి గురించి హోం మంత్రిత్వ శాఖకు తెలియజేశారు. ఇప్పుడు కేంద్ర హోం మంత్రిత్వ శాఖ నుండి ఏవైనా సూచనలు అందిన తర్వాతే జార్ఖండ్ పోలీసులు తదుపరి చర్యలు తీసుకుంటారు.