హైదరాబాద్ సహా పలు జిల్లాలకు ఎల్లో అలర్ట్.. అర్ధరాత్రి వరకు ఉరుములతో కూడిన వర్షాలు!

దిశ, వెబ్‌డెస్క్: హైదరాబాద్ నగరవాసులతో పాటు తెలంగాణలోని పలు జిల్లాల ప్రజలకు హైదరాబాద్ వాతావరణ కేంద్రం అత్యంత కీలకమైన హెచ్చరికలు జారీ చేసింది. రాగల కొన్ని గంటల్లో రాష్ట్రవ్యాప్తంగా ఉరుములు, మెరుపులతో కూడిన వర్షాలు కురిసే అవకాశం ఉందని పేర్కొంటూ వాతావరణ శాఖ ఎల్లో అలర్ట్ (Yellow Alert) ప్రకటించింది. ముఖ్యంగా గ్రేటర్ హైదరాబాద్ పరిధిలోని హైదరాబాద్, రంగారెడ్డి, మేడ్చల్ జిల్లాల ప్రజలు అత్యంత అప్రమత్తంగా ఉండాలని అధికారులు ప్రత్యేకంగా హెచ్చరించారు.

అర్ధరాత్రి ఒంటి గంట వరకు వర్ష సూచన..

వాతావరణ శాఖ తాజా అంచనాల ప్రకారం.. అర్ధరాత్రి ఒంటి గంట వరకు నగరంతో పాటు శివారు ప్రాంతాలలో భారీ వర్షాలు కురిసే అవకాశం ఉంది. వానతో పాటు గంటకు 40 కిలో మీటర్ల వేగంతో బలమైన ఈదురుగాలులు వీచే ప్రమాదం ఉందని అధికారులు హెచ్చరించారు. తెలంగాణ వ్యాప్తంగా విస్తారంగా ఉరుములతో కూడిన వర్షాలు పడే అవకాశం ఉన్నందున, ప్రజలు జాగ్రత్తగా ఉండాలని విపత్తు నిర్వహణ శాఖ అధికారులు విజ్ఞప్తి చేశారు. ముఖ్యంగా రాత్రి వేళల్లో ప్రయాణాలు చేసే వాహనదారులు రోడ్లపై నీటి నిల్వలను గమనిస్తూ అప్రమత్తంగా ఉండాలని సూచించారు.