కళ్ల ముందే చెదిరిన గూడు.. ఎన్నో ప్రాణాలకు నీడనిచ్చి నిలువెల్లా కూలి.. (వీడియో)

దిశ, వెబ్‌డెస్క్ : సోషల్ మీడియా ఓ వీడియో అందరినీ ఆలోచింపజేస్తుంది. భావితరాలను కలవరానికి గురి చేస్తుంది. నైంటీస్ కిడ్స్‌కు కన్నీళ్లు తెప్పిస్తుంది. మనిషి స్వార్ధానికి ఈ వీడియో సజీవ సాక్ష్యం. ‘ఏరు దాటిందాక ఏటి మల్లయ్య.. ఏరు దాటాక బోడి మల్లయ్య..’ అనే నానుడిని ఈ వీడియో నిజం చేస్తుంది. అందరి మనసులను కలచివేస్తున్న ఈ వీడియోలో ఏం ఉందంటే..

సుమారు 40 ఏళ్ల వయసుకు పైబడిన వృక్షం ఓ రైతు పొలంలో ఉంది. దానిని ఆవాసంగా చేసుకుని పక్షులు గూళ్లు కట్టుకున్నాయి. ఉడుతలు ఆ చెట్టు పైనే జీవనం ఏర్పాటు చేసుకుని పంటపొలాల్లో దొరికే గింజలను తింటూ జీవిస్తున్నారు. రైతులకు, కూలీలకు ఎన్నో ఏళ్లుగా ఎండ నుంచి నీడను, వర్షంలో తడిసి ముద్దకాకుండా కాపాడిన ఆ చెట్టు నేడు నెలకు ఒరిగింది. దానికి అది నేలమట్టం కాలేదు.. మనిషి స్వార్ధానికి తలెత్తుకుని నిలబడలేక తల వాల్చింది. దానినే నమ్ముకుని జీవిస్తున్న పిచ్చుక వృక్షంతోపాటు కన్నుమూసింది. ఆ పక్షి గూడు చెల్లాచెదరైపోయింది. చెట్టుపై చెంగున ఎగురుతున్న ఉడుత ఈ హఠత్ పరిణామానికి స్పృహ కోల్పోయి పడిపోయింది. రంపం వేటుకు 40 ఏళ్ల చెట్టు విలవిలాడుతూ పొలంలో వాలిపోయింది. ఇక నేటి నుంచి ఆ చెట్టు కనిపించదు. రేపటి నుంచి ఆ వృక్షం ఒక జ్ఞాపకం.. ఎండలో సేద తీరే పశువులు ఇక మరో చెట్టును వెతుక్కోవాల్సిందే..

ఈ చెట్టుకు కొట్టేసింది ఎవరు..? ఎక్కడ? ఏ గ్రామం అని తెలియనప్పటికీ సోషల్ మీడియాలో ఆ వీడియోని చూసిన ప్రతి ఒక్కరూ చలిస్తున్నారు. కళ్ల ముందే మనిషి ప్రాణం పోయినట్టు తల్లడిల్లుతున్నారు. ఇవాళ అక్కడ నేల రాలింది చెట్టు మాత్రమే కాదు.. పక్షులు, జీవరాశులు.. మనిషి నిలువ నీడను కోల్పోయాడు.. అంటూ నెటిజన్లు తన ఆవేదనను వ్యక్తం చేస్తున్నారు.