కాంగ్రెస్ నేతల నోళ్లకు తాళాలు!
దిశ, తెలంగాణ బ్యూరో : రాష్ట్రంలో కాంగ్రెస్ శ్రేణులు ఎలాంటి అంశాలపై కూడా మాట్లాడటం లేదు. ఎటూ తెగని టీపీసీసీ అంశం పార్టీ నేతల నోళ్లకు తాళాలు వేసింది. దాదాపు 40 రోజుల పాటు రేపు, మాపు అంటూ సాగిన టీపీసీసీ చీఫ్ ఎన్నిక మరోసారి దూరమైంది. మళ్లీ ఉత్తమ్కే పగ్గాలు అప్పగించారు. ఈ పరిణామాలు ఎలా ఉన్నా ప్రస్తుతం పార్టీ నుంచి కనీసం కేంద్ర కొత్త చట్టాలపై మాట్లాడే నేతలు కూడా లేకుండా పోయారు. రాష్ట్రంలో పరిస్థితులపై గళమెత్తే ఎంపీ రేవంత్రెడ్డి, ఇతర నేతలు కూడా సైలెంట్ అయిపోయారు. టీపీసీసీ చీఫ్ ఎంపిక వాయిదా పడినప్పటి నుంచి మీడియాకు కూడా ముఖం చూపించడం లేదు. దీంతో పార్టీ నేతల్లో కూడా నైరాశ్యం నెలకొంది.
అటు కోమటిరెడ్డి వెంకట్రెడ్డి కూడా అదే పరిస్థితి. తన సొదరుడి వ్యవహారమే తనుక తలనొప్పిగా మారింది. సొదరుడినే సముదాయించుకోలేని పరిస్థితుల్లో రాష్ట్రంలో పార్టీని ఎలా నడిపిస్తారనే ప్రశ్నలు తలెత్తాయి. అటు రాజగోపాల్రెడ్డి కూడా విమర్శలు ఆపలేదు. బీజేపీలోకి వెళ్తామని, కాంగ్రెస్ పార్టీ రాష్ట్రంలో లేదని, ఇతర ప్రాంతాల నుంచి వచ్చిన వారికి రాష్ట్ర రాజకీయాలు ఎలా తెలుస్తాయంటూ ఘాటుగా విమర్శలు చేస్తున్నారు. మరోవైపు పార్టీ తరుఫున అప్పుడో, ఇప్పుడో ప్రకటనలు చేసే వీహెచ్, వంశీచంద్రెడ్డి, శ్రవణ్, మధుయాష్కి, నిరంజన్, కుసుమ కుమార్, మల్లు రవితో పాటు మిగతా నేతలందరూ ప్రస్తుతం మౌనంగా ఉంటున్నారు. నిజామాబాద్ జిల్లాలో షబ్బీర్ అలీకి సొంత పార్టీ నేతల నుంచి వ్యతిరేకత వస్తుండటంతో ఆయన కూడా గాంధీ భవన్ వైపే రావడం మానేశారు. సీఎల్పీ నేత భట్టి విక్రమార్క, ఎమ్మెల్యేలు శ్రీధర్బాబు, జగ్గారెడ్డి కూడా సొంత నియోజకవర్గాలకే పరిమితమవుతున్నారు.
రచ్చగా ‘టీపీసీసీ’ అంశం
టీపీసీసీ కొత్త అధ్యక్షుడి అంశం పార్టీలో రచ్చగా మారింది. రేవంత్రెడ్డికి ఇస్తారనే ప్రచారంతో సీనియర్లు బహిరంగంగానే ఎదురుదాడి చేశారు. సోనియాకు లేఖలు పంపారు. ఈ పరిణామాల్లో వెంకట్రెడ్డి పేరు ప్రాధాన్యతకు వచ్చింది. అయితే అనూహ్యంగా ఎమ్మెల్సీ జీవన్రెడ్డికి ఖరారు అయిందని, త్వరలోనే ప్రకటిస్తారని ఈ నెల ప్రారంభంలోనే ప్రచారమైంది. అధిష్ఠానం నుంచి కూడా క్లియరెన్స్ వచ్చిందంటూ చెప్పుకున్నారు. కానీ కేవలం జానారెడ్డి కోరిక మేరకు సాగర్ ఉప ఎన్నిక వరకు వాయిదా వేశారని మళ్లీ చెప్పుతున్నారు. దీనిపై రాష్ట్ర ఇన్‌చార్జి మాణిక్కం ఠాగూర్ కూడా ఢిల్లీ నుంచి ప్రకటన చేయాల్సి వచ్చింది. ఈ అంశం ద్వారా రాష్ట్ర నేతల్లోని విభేదాలు బయటకు వచ్చాయి. అసలు కాంగ్రెస్ పార్టీ నేతలు కలిసి ఉండడమంటూ కలేననే పరిస్థితులు నెలకొన్నాయి.
‘ఎమ్మెల్సీ’ పరిస్థితేంటో?
మరోవైపు రాష్ట్రంలో జరుగబోయే పట్టబద్రుల ఎమ్మెల్సీ ఎన్నికలకు అభ్యర్థులను ఎంపిక చేయడంలో మాణిక్కం ఠాగూర్ పరిశీలన చేస్తున్నట్లు పార్టీ నేతలు చెప్పుతున్నారు. దీనికి కూడా పలువురు నేతల నుంచి అభిప్రాయాలను సేకరించినట్లు సమాచారం. హైదరాబాద్, రంగారెడ్డి, మహబూబ్నగర్ స్థానానికి మాజీ మంత్రి చిన్నారెడ్డికి అవకాశం ఇస్తున్నారని చెప్పుకుంటున్నారు. అయితే రేసులో ఇప్పటికే వంశీచంద్రెడ్డితో పాటు పలువురు నేతలున్నారు. అదేవిధంగా వరంగల్, ఖమ్మం, నల్గొండ పట్టబద్రుల స్థానం నుంచి రాములు నాయక్ను పోటీకి దింపుతారని భావిస్తున్నారు. ఈ స్థానం నుంచి ఏఐసీసీ జాతీయ అధికార ప్రతినిధి దాసోజు శ్రవణ్, విద్యార్థి నాయకుడు మానవతారాయ్ పలువురు పోటీ పడుతున్నారు. ఈ నేపథ్యంలో ఈ ఎన్నికలతో కాంగ్రెస్ పార్టీలోలో పరిస్థితి ఏ విధంగా ఉంటుందోనని పలువురు చర్చించుకుంటున్నారు.
