హింసాత్మకంగా మారిన కార్మికుల నిరసన.. వాహనాలకు నిప్పు
నోయిడాలో వేతనాల పెంపు కోసం కార్మికుల హింసాత్మక నిరసన! వాహనాలకు నిప్పు, ఆస్తుల ధ్వంసం. రంగంలోకి భారీ పోలీసు బలగాలు.
దిశ, వెబ్ డెస్క్: తమ వేతనాలు పెంచాలని డిమాండ్ చేస్తూ.. కార్మికులు చేపట్టిన నిరసన కార్యక్రమం హింసాత్మకంగా మారింది. ఈ ఘటన ఉత్తర ప్రదేశ్లోని నోయిడా ఫేజ్-2 పారిశ్రామిక ప్రాంతంలో సోమవారం ఉదయం చోటు చేసుకొని తీవ్ర ఉద్రిక్తతలకు దారి తీసింది. తమ వేతనాలను పెంచాలనే డిమాండ్తో ఒక ప్రైవేట్ కంపెనీకి చెందిన వందలాది మంది కార్మికులు చేపట్టిన ఆందోళన ఒక్కసారిగా హింసాత్మకంగా మారింది. హర్యానా ప్రభుత్వం ఇటీవల కనీస వేతనాలను 35 శాతం పెంచుతూ తీసుకున్న నిర్ణయంతో ప్రేరణ పొందిన కార్మికులు, తమకు కూడా అదే స్థాయిలో వేతనాలు పెంచాలని డిమాండ్ చేస్తూ గత రెండు రోజులుగా నిరసనలు తెలుపుతున్నారు. ఈ క్రమంలో సోమవారం ఉదయం నిరసనకారులు ఒక్కసారిగా ఆవేశానికి లోనై రోడ్డుపై ఉన్న వాహనాలను ధ్వంసం చేయడమే కాకుండా, ఒక వాహనానికి నిప్పు పెట్టారు. సమీపంలోని ఆస్తులపై రాళ్లు రువ్వడంతో పారిశ్రామిక వాడలో భయాందోళనలు నెలకొన్నాయి.
పరిస్థితి విషమించడంతో గౌతమ్ బుద్ధ నగర్ పోలీసులు రంగంలోకి దిగి భారీగా బలగాలను మోహరించారు. ఆందోళనకారులను చెదరగొట్టేందుకు పోలీసులు భాష్పవాయువు (Tear Gas) ప్రయోగించాల్సి వచ్చింది. జిల్లా యంత్రాంగం ఇప్పటికే పారిశ్రామిక సంస్థల ప్రతినిధులతో చర్చలు జరిపి ఆదివారమే కొన్ని మార్గదర్శకాలు విడుదల చేసినప్పటికీ, నేడు ఈ స్థాయిలో అల్లర్లు జరగడం గమనార్హం. ప్రస్తుతం అక్కడ ఉద్రిక్తత కొనసాగుతున్నప్పటికీ, పోలీసులు పరిస్థితిని నిశితంగా పర్యవేక్షిస్తున్నారు. ఆస్తుల ధ్వంసానికి పాల్పడిన వారిని గుర్తించి చట్టపరమైన చర్యలు తీసుకుంటామని ఉన్నతాధికారులు వెల్లడించారు.
