రష్యా - ఉక్రెయిన్ యుద్ధానికి రెండు రోజుల బ్రేక్

దిశ, వెబ్ డెస్క్ : రష్యా, ఉక్రెయిన్ దేశాల మధ్య గత నాలుగేళ్లకు పైగా ఎడతెరిపి లేకుండా కొనసాగుతున్న భీకర యుద్ధానికి ఒక చిన్న బ్రేక్ పడింది. క్రైస్తవుల అత్యంత పవిత్రమైన ఆర్థడాక్స్ ఈస్టర్ (Orthodox Easter) పర్వదినాన్ని పురస్కరించుకుని, రెండు రోజుల పాటు యుద్ధానికి తాత్కాలికంగా స్వస్తి పలకాలని రష్యా అధ్యక్షుడు వ్లాదిమిర్ పుతిన్ సంచలన నిర్ణయం తీసుకున్నారు. ఉక్రెయిన్ ప్రభుత్వం పంపిన ప్రతిపాదనకు సానుకూలంగా స్పందించిన క్రెమ్లిన్, ఈ నెల 11వ తేదీ సాయంత్రం 4 గంటల నుండి 12వ తేదీ అర్ధరాత్రి వరకు యుద్ధ క్షేత్రంలో కాల్పుల విరమణ (Ceasefire) అమలవుతుందని అధికారికంగా వెల్లడించింది.

యుద్ధం ప్రారంభమైన తర్వాత మతపరమైన కారణాలతో ఇంత సుదీర్ఘ సమయం పాటు దాడులను నిలిపివేయడం ఇదే మొదటిసారి కావడంతో, అంతర్జాతీయ సమాజం ఈ నిర్ణయాన్ని స్వాగతిస్తోంది. ఈ రెండు రోజుల విరామం కేవలం సైనిక చర్యల నిలిపివేత మాత్రమే కాకుండా, యుద్ధం వల్ల అతలాకుతలమైన సరిహద్దు ప్రాంతాల ప్రజలకు, సైనికులకు మానసిక ప్రశాంతతను ఇచ్చే ప్రయత్నంగా విశ్లేషకులు భావిస్తున్నారు.