"నువ్వో చెత్త రిపోర్టర్".. : జర్నలిస్టుపై ట్రంప్ ఆగ్రహం

దిశ, వెబ్ డెస్క్ : అమెరికా మాజీ అధ్యక్షుడు డొనాల్డ్ ట్రంప్ మరోసారి తన వివాదాస్పద వ్యాఖ్యలతో వార్తల్లో నిలిచారు. తాజాగా ఓ మీడియా సమావేశంలో మహిళా జర్నలిస్ట్ ఎప్‌స్టీన్ ఫైల్స్ మీద ప్రశ్న అడిగిన తీరుపై ఆయన తీవ్ర అసహనం వ్యక్తం చేశారు. ప్రశ్న నచ్చలేదన్న కారణంతోనే ట్రంప్ ఒక్కసారిగా ఆగ్రహానికి లోనై.. "నువ్వో చెత్త రిపోర్టర్‌వి, నీ ముఖంలో ఎప్పుడూ స్మైలే ఉండదు" అంటూ బహిరంగంగా వ్యాఖ్యానించారు. ఈ వ్యాఖ్యలపై అక్కడున్న మీడియా ప్రతినిధులు అసంతృప్తి వ్యక్తం చేయగా.. నెట్టింట్లోనూ తీవ్ర చర్చకు దారి తీశాయి. ఒక ప్రజాస్వామ్య దేశంలో మీడియా ప్రశ్నలు అడగడం సహజం అని, ఓ మహిళా జర్నలిస్ట్‌ను దేశానికి అధ్యక్షుని హోదాలో ఉండి వ్యక్తిగతంగా టార్గెట్ చేయడం సరైంది కాదని పలువురు అభిప్రాయపడుతున్నారు.

ఈ ఘటన జరిగిన వెంటనే సోషల్ మీడియాలో వీడియో క్లిప్స్ వైరల్ అయ్యాయి. ట్రంప్ ప్రశ్నకు సమాధానం ఇవ్వకుండా, జర్నలిస్ట్ వ్యక్తిత్వంపై వ్యాఖ్యలు చేయడం చూసి చాలామంది ఆశ్చర్యం వ్యక్తం చేశారు. ముఖ్యంగా "ముఖంలో స్మైలే లేదు.. ఇంకాస్త నవ్వుతూ ఈ ప్రశ్న అడగాల్సింది" అనే మాటలు మహిళా జర్నలిస్టుల పట్ల అవమానకరంగా ఉన్నాయంటూ విమర్శలు వెల్లువెత్తాయి. మీడియా పని ప్రశ్నలు అడగడమే కానీ, ఎవరినీ మెప్పించడం కాదని జర్నలిస్టు సంఘాలు స్పష్టం చేశాయి. ట్రంప్ గతంలో కూడా మీడియాపై, ముఖ్యంగా మహిళా రిపోర్టర్లపై ఇలాంటి వ్యాఖ్యలు చేసిన సందర్భాలు ఉన్నాయని వారు గుర్తుచేశారు.

ఇక మరోవైపు ట్రంప్ అభిమానులు మాత్రం ఆయనకు మద్దతుగా నిలుస్తున్నారు. "మీడియా తరచూ ట్రంప్‌ను టార్గెట్ చేస్తోంది", "రెచ్చగొట్టే ప్రశ్నలు అడుగుతున్నారు" అంటూ సోషల్ మీడియాలో పోస్టులు పెడుతున్నారు. ట్రంప్ స్టైల్ ఇదే అని, ఆయన ఎవరినీ లెక్కచేయరని వెనకేసుకొని వస్తున్నారు. అయితే రాజకీయ నేత మాటలు సమాజంపై ప్రభావం చూపుతాయని, ముఖ్యంగా మహిళల పట్ల ఇలాంటి వ్యాఖ్యలు చేయడం సరైంది కాదని విశ్లేషకులు హెచ్చరిస్తున్నారు.

ఈ ఘటన మరోసారి ట్రంప్ - మీడియా మధ్య ఉన్న ఉద్రిక్తతను బయటపెట్టింది. ఒకవైపు మీడియా స్వేచ్ఛా, మరోవైపు వివాదాస్పద రాజకీయ నాయకుడు.. వీరి మధ్య ఇలాంటి ఘర్షణ కొత్తది కాకపోయినా, మహిళా జర్నలిస్ట్‌ను లక్ష్యంగా చేసుకున్న వ్యాఖ్యలు మాత్రం హర్షణీయంగా లేవని అభిప్రాయపడుతున్నారు. ఈ వ్యవహారం ఎటు దారి తీస్తుందో తెలియదు కానీ ట్రంప్ వ్యాఖ్యలు మాత్రం పెద్ద దుమారం రేపుతున్నాయి.