ఏపీలో విషాదం.. బైక్ యాక్సిడెంట్ లో ముగ్గురు యువకులు మృతి

దిశ, వెబ్ డెస్క్ : తూర్పుగోదావరి జిల్లా నరసాపురం వద్ద జరిగిన ఒక రోడ్డు ప్రమాదంలో ముగ్గురు యువకులు దుర్మరణం పాలవ్వడం స్థానికంగా తీవ్ర విషాదాన్ని నింపింది. పోలీసులు తెలిపిన వివరాల ప్రకారం, గాదరాడ గ్రామానికి చెందిన నక్కా అంజన్న (30), సాడిపల్లి వీర దుర్గా (26), కుర్రం నాగు (24) అనే ముగ్గురు యువకులు ఒకే ద్విచక్ర వాహనంపై ప్రయాణమయ్యారు. వీరంతా గాదరాడ గ్రామం నుండి కోరుకొండ వైపు వెళుతుండగా, నరసాపురం సమీపంలోకి రాగానే వారు ప్రయాణిస్తున్న బైక్ నియంత్రణ కోల్పోయి రోడ్డు పక్కనే ఉన్న ఒక చెట్టును బలంగా ఢీకొట్టింది. దీంతో ఆ ముగ్గురు యువకులు తీవ్ర గాయాలపాలై అక్కడికక్కడే ప్రాణాలు కోల్పోయారు. ఈ ప్రమాదంపై సమాచారం అందుకున్న వెంటనే పోలీసులు ఘటనా స్థలానికి చేరుకుని పరిస్థితిని సమీక్షించారు.

మృతదేహాలను పరిశీలించి, పోస్ట్‌మార్టం నిమిత్తం స్థానిక ప్రభుత్వ ఆసుపత్రికి తరలించారు. అనంతరం మృతుల వివరాలను సేకరించి, వారు గాదరాడ గ్రామానికి చెందిన వారిగా గుర్తించి వారి కుటుంబ సభ్యులకు సమాచారం అందించారు. ఈ ఘటనపై కేసు నమోదు చేసుకున్న పోలీసులు ప్రమాదం ఎలా జరిగింది అనే కోణంలో పూర్తిస్థాయి దర్యాప్తును ప్రారంభించారు. ఒకే గ్రామానికి చెందిన ముగ్గురు యువకులు ఇలా రోడ్డు ప్రమాదంలో మరణించడంతో గాదరాడ గ్రామంలో తీవ్ర విషాద ఛాయలు అలముకున్నాయి.