అంగన్వాడీ కేంద్రంలో 'తొలిముద్ద'
బూర్గంపాడు మండలం లక్ష్మీపురం గ్రామంలోని అంగన్వాడీ కేంద్రంలో తెలంగాణ ప్రభుత్వం ప్రతిష్ఠాత్మకంగా ప్రవేశపెట్టిన 'తొలిముద్ద' అల్పాహారం కార్యక్రమాన్ని శనివారం ఘనంగా నిర్వహించారు.
దిశ,బూర్గంపాడు: బూర్గంపాడు మండలం లక్ష్మీపురం గ్రామంలోని అంగన్వాడీ కేంద్రంలో తెలంగాణ ప్రభుత్వం ప్రతిష్ఠాత్మకంగా ప్రవేశపెట్టిన 'తొలిముద్ద' అల్పాహారం కార్యక్రమాన్ని శనివారం ఘనంగా నిర్వహించారు. ఈ కార్యక్రమంలో భాగంగా అంగన్వాడీ కేంద్రానికి వచ్చిన చిన్న పిల్లలకు అధికారులు, ప్రజాప్రతినిధులు స్వయంగా ఉదయం పూట పోషకాలతో కూడిన అల్పాహారాన్ని(కిచిడీ/ఉప్మా) వడ్డించారు. ఈ సందర్భంగా మండల పరిషత్ అభివృద్ధి అధికారి జమలారెడ్డి మాట్లాడుతూ.. చిన్నారులలో పౌష్టికాహార లోపాన్ని నివారించి, వారి ఆరోగ్యకరమైన ఎదుగుదలకు ప్రభుత్వం ఈ 'తొలిముద్ద' పథకాన్ని ప్రత్యేకంగా అమల్లోకి తెచ్చిందన్నారు.
అంగన్వాడీ కేంద్రాలకు ప్రతిరోజూ చిన్నారులను సక్రమంగా పంపించి, ఈ పౌష్టికాహార సేవలను తల్లిదండ్రులు సద్వినియోగం చేసుకోవాలని కోరారు. అలాగే గ్రామ సర్పంచ్ బాదం వెంకటేశ్వర రెడ్డి మాట్లాడుతూ.. చిన్నతనంలోనే పిల్లలకు పోషకాహారం అందడం వల్ల వారి శారీరక, మానసిక వికాసం మెరుగవుతుందని పేర్కొన్నారు. అంగన్వాడీ సిబ్బంది చిన్నారుల పట్ల ప్రత్యేక శ్రద్ధ వహించాలని సూచించారు.ఈ కార్యక్రమంలో ఏపీవో విజయలక్ష్మి, ఉప సర్పంచ్ పున్నారెడ్డి అంగన్వాడీ టీచర్లు, ఆయాలు, స్థానిక ప్రజాప్రతినిధులు, చిన్నారుల తల్లులు తదితరులు పాల్గొన్నారు.
