బ్లాక్ బస్టర్ హిట్ ఎఫెక్ట్.. భారీగా రెమ్యునరేషన్ పెంచేసిన నవీన్ పొలిశెట్టి..

దిశ, సినిమా: టాలీవుడ్ యంగ్ హీరో నవీన్ పొలిశెట్టి(Naveen Polishetty) తన నటనతో, కామెడీ టైమింగ్‌తో ప్రేక్షకుల్లో ప్రత్యేక గుర్తింపును సంపాదించుకున్నాడు. ‘ఏజెంట్ సాయి శ్రీనివాస్ ఆత్రేయ’ సినిమాతో ఇండస్ట్రీకి పరిచయమైన నవీన్.. తొలి ప్రయత్నంతోనే విమర్శకుల ప్రశంసలు అందుకున్నాడు. అయితే అసలైన బ్రేక్ మాత్రం ‘జాతి రత్నాలు’తో వచ్చింది. ఈ సినిమా నవీన్ కెరీర్‌ను పూర్తిగా మార్చేసింది. కడుపుబ్బా నవ్వించే వినోదంతో బాక్సాఫీస్‌ను షేక్ చేసిన ఈ చిత్రం సూపర్ హిట్‌గా నిలవడంతో నవీన్ ఒక్కసారిగా స్టార్ హీరోల సరసన నిలిచాడు. ఈ సినిమా తర్వాత ఆయన క్రేజ్, ఫాలోయింగ్ మరింత పెరిగాయి. ‘జాతి రత్నాలు’ తర్వాత చేసిన సినిమాలు ఆశించిన స్థాయిలో విజయాన్ని అందుకోలేకపోయాయి.

అయినప్పటికీ నవీన్ పొలిశెట్టి క్రేజ్ మాత్రం తగ్గలేదు. 2023లో స్టార్ హీరోయిన్ అనుష్క శెట్టితో కలిసి ‘మిస్ శెట్టి మిస్టర్ పొలిశెట్టి’పై నటించాడు. భారీ అంచనాల మధ్య వచ్చిన ఈ సినిమా ప్రేక్షకులను పూర్తిగా మెప్పించలేకపోయింది. దీంతో నవీన్ కొంతకాలం సినిమాలకు బ్రేక్ ఇచ్చి, సరైన కథల ఎంపికపై దృష్టి పెట్టాడు. ఇక ఈ సంక్రాంతికి ‘అనగనగా ఒక రాజు’ సినిమాతో గ్రాండ్ కంబ్యాక్ ఇచ్చాడు నవీన్ పొలిశెట్టి. ఈ చిత్రం ప్రేక్షకుల నుంచి మంచి స్పందన పొందడంతో పాటు బాక్సాఫీస్ వద్ద భారీ కలెక్షన్లతో దూసుకుపోతోంది. సినిమా విజయం నవీన్ కెరీర్‌కు కొత్త ఊపును తీసుకొచ్చింది. ఈ క్రమంలో.. తాజాగా నవీన్ పొలిశెట్టికి సంబంధించిన ఓ ఆసక్తికరమైన వార్త ఇండస్ట్రీలో హాట్ టాపిక్‌గా మారింది. ‘అనగనగా ఒక రాజు’ (Anaganaga Oka Raju)హిట్ తర్వాత ఆయన రెమ్యునరేషన్ భారీగా పెరిగినట్లు తెలుస్తోంది. తదుపరి సినిమాకు నవీన్ పొలిశెట్టి దాదాపు రూ. 15 కోట్ల వరకు పారితోషికం అందుకోనున్నాడని టాలీవుడ్ వర్గాల్లో టాక్ వినిపిస్తోంది.