ముంబై మేయర్ పీఠం పై వీడిన సస్పెన్షన్.. బీజేపీ, శివసేన అభ్యర్థులు ఖరారు!

దిశ, వెబ్ డెస్క్: భారత దేశ ఆర్థిక రాజధాని అయిన ముంబై మున్సిపల్ కార్పొరేషన్ ఎన్నికల ఫలితాలు వెలువడిన నాటి నుండి మేయర్ పీఠం ఎవరికి దక్కుతుందనే ఉత్కంఠ నెలకొంది.ఈ ఉత్కంఠకు తెర దించుతూ, బీజేపీ, శివసేన అభ్యర్థులు ఈ రోజు మేయర్, డిప్యూటీ మేయర్ స్థానాల కోసం నామినేషన్ వేశారు. శనివారం బీజేపీ కార్పొరేటర్ల కీలక సమావేశం అనంతరం, మేయర్ అభ్యర్థిగా సీనియర్ నేత రీతూ తావ్డే (Ritu Tawde) పేరును ప్రకటించారు. అదేవిధంగా, డిప్యూటీ మేయర్ పదవికి ముఖ్యమంత్రి ఏకనాథ్ షిండే నేతృత్వంలోని శివసేన నుంచి సంజయ్ శంకర్ ఘాడీ (Sanjay Shankar Ghadi) నామినేషన్ దాఖలు చేశారు. సుమారు 40 ఏళ్ల తర్వాత బీజేపీకి చెందిన నాయకురాలు మేయర్ కుర్చీలో కూర్చోబోతుండటం ఇక్కడ విశేషం.

హోరాహోరీగా సాగిన ఎన్నికల ఫలితాలు

ముంబై మహానగర కార్పొరేషన్ ఎన్నికలు 227 స్థానాలకు జనవరి 15న ఎన్నికలు జరగ్గా.. ఓట్ల లెక్కింపు జనవరి 16న జరిగింది. ఈ ఓట్ల లెక్కింపులో ఏ పార్టీకి స్పష్టమైన మెజారిటీ రాకపోవడంతో 'రిసార్ట్ పాలిటిక్స్' మొదలయ్యాయి. ఈ పలితాల్లో బీజేపీ 89 స్థానాలను గెలుచుకుని అతిపెద్ద పార్టీగా అవతరించగా, దాని మిత్రపక్షం శివసేన (షిండే వర్గం) 29 స్థానాలను దక్కించుకుంది. ఈ కూటమికి మొత్తం 118 స్థానాల మద్దతు ఉండటంతో మేయర్ ఎన్నిక సులభతరమైంది. మరోవైపు, ఉద్ధవ్ ఠాక్రే నేతృత్వంలోని శివసేన (UBT) 65 స్థానాలతో గట్టి పోటీ ఇచ్చినప్పటికీ, అధికారాన్ని నిలబెట్టుకోవడంలో వెనుకంజలో పడింది. ఈ ఫలితాలతో మూడు దశాబ్దాల తర్వాత ఠాక్రే కుటుంబం బీఎంసీపై పట్టు కోల్పోవడం గమనార్హం.

మహా యుతి వ్యూహం - మలుపులు

ఇదిలా ఉంటే మేయర్ పదవిని రొటేషన్ పద్ధతిలో పంచుకోవాలని షిండే వర్గం కోరినట్లు వార్తలు వచ్చినా, చివరకు బీజేపీ సీనియర్ నేత వైపే మొగ్గు చూపారు. ఈ ఉత్కంఠ భరిత పరిణామాల మధ్య నామినేషన్లు దాఖలు కావడంతో సోమవారం జరగబోయే ఎన్నిక కేవలం లాంఛనమే కానుంది. ఢిల్లీ ఎంసీడీ (MCD) ఎన్నికల ఫలితాల తరహాలోనే ముంబైలో కూడా బీజేపీ తన పట్టును నిరూపించుకుంది. ఈ విజయంతో ముంబై నగర అభివృద్ధికి కొత్త వేగం పుంజుకుంటుందని ముఖ్యమంత్రి దేవేంద్ర ఫడ్నవీస్, డిప్యూటీ సీఎం ఏకనాథ్ షిండే ఆశాభావం వ్యక్తం చేశారు.