ఓ వైపు వడగాలులు... మరోవైపు వర్షాలు.. తెలుగు రాష్ట్రాల్లో విచిత్ర వాతావరణం

దిశ, వెబ్ డెస్క్ : తెలుగు రాష్ట్రాల్లో ప్రస్తుతం విచిత్ర వాతావరణ పరిస్థితులు నెలకొన్నాయి. ఇటు తెలంగాణలో, అటు ఏపీలో ఒకే సమయంలో భిన్నమైన వాతావరణం కనిపిస్తోంది. హైదరాబాద్, రంగారెడ్డి, మేడ్చల్, నిజామాబాద్, ఖమ్మం, కరీంనగర్ వంటి తెలంగాణ ప్రాంతాల్లో తీవ్రమైన వేడి మరియు వడగాలులు వీస్తుండగా, ఉష్ణోగ్రతలు ఏకంగా 40 డిగ్రీల సెల్సియస్ వరకు నమోదవుతున్నాయి. దీనికి భిన్నంగా ఆంధ్రప్రదేశ్ లోని విజయవాడ, గుంటూరు, శ్రీకాకుళం, విశాఖపట్నం, రాజమహేంద్రవరం, నెల్లూరు వంటి తీరప్రాంతాల్లో ఉరుములు, మెరుపులతో కూడిన భారీ వర్షాలు కురుస్తున్నాయి. కొన్ని ప్రాంతాల్లో అయితే వడగాలులు, వర్షం ఒకేసారి ఎదురయ్యే వింత పరిస్థితులు కూడా కనిపిస్తున్నాయి.

ఈ విచిత్రమైన వాతావరణ మార్పులకు ఎల్ నినో ప్రభావం, రుతుపవనాల ముందస్తు వేగం, స్థానిక వాతావరణ వ్యత్యాసాలే ప్రధాన కారణాలని వాతావరణ శాఖ పేర్కొంది. ఈ భిన్న పరిస్థితులు మరికొన్ని రోజుల పాటు కొనసాగే అవకాశం ఉందని అధికారులు అంచనా వేస్తున్నారు. ఈ నేపథ్యంలో తీవ్రమైన ఎండలు ఉన్న ప్రాంతాల్లోని ప్రజలు మధ్యాహ్నం 12 గంటల నుండి సాయంత్రం 4 గంటల వరకు అత్యవసరమైతే తప్ప బయటకు రావద్దని హెచ్చరించారు. అలాగే భారీ వర్షాలు కురుస్తున్న ప్రాంతాల్లో వరదలు రావడం, చెట్లు కూలిపోవడం, విద్యుత్ సరఫరా నిలిచిపోవడం వంటి సమస్యలు ఎదురవుతున్నందున స్థానిక ప్రజలు, వాహనదారులు అప్రమత్తంగా ఉండాలని సూచించారు.