క్రికెట్లో సరికొత్త చరిత్ర.. రాష్ట్ర తొలి ట్రాన్స్జెండర్ అంపైర్గా రితికా శ్రీ
తమిళనాడులో మొదటి ట్రాన్స్జెండర్ క్రికెట్ అంపైర్గా రితికా శ్రీ బాధ్యతలు చేపట్టి చరిత్ర సృష్టించారు. ఎన్నో ఒడిదుడుకులను ఎదుర్కొని క్రికెట్ మైదానంలో అంపైర్గా నిలిచిన ఆమె ప్రయాణం స్ఫూర్తిదాయకం.
దిశ, వెబ్ డెస్క్: రాష్ట్ర క్రికెట్ చరిత్రలో సరికొత్త అధ్యాయం నెలకొంది. తమిళనాడుకు చెందిన రితికా శ్రీ (Ritika Shri) క్రికెట్ రంగంలో అరుదైన ఘనత సాధించి వార్తల్లో నిలిచారు. సేలంలో ఆర్. ముత్తురాజ్గా జన్మించిన ఆమె, లింగ మార్పిడి తర్వాత రితికా శ్రీగా మారి తమిళనాడు రాష్ట్రంలోనే మొట్టమొదటి ట్రాన్స్జెండర్ క్రికెట్ అంపైర్ (Transgender cricket umpire)గా రికార్డు సృష్టించారు. 2019లో మొహాలీలో ఐటీఐ ప్రొఫెషనల్గా పనిచేస్తున్న సమయంలో ఐపీఎల్ మ్యాచ్లు చూసి అంపైర్ కావాలనే స్ఫూర్తి పొందానని, లాక్డౌన్ సమయంలో సేలంకు తిరిగి వచ్చి అంపైరింగ్లో శిక్షణ పొందానని ఆమె వివరించారు.
తన ప్రయాణంలో ఎదురైన సవాళ్లను అధిగమించడంలో సేలం జిల్లా అసోసియేషన్ అంపైర్ కమిటీ చైర్మన్ జయరామన్, ఆయన భార్య అందించిన ప్రోత్సాహం మరువలేనిదని రితికా పేర్కొన్నారు. తన లింగ మార్పిడి గురించి తెలిసినా వారు ఎంతో క్రీడా స్ఫూర్తితో ఆదరించి, శస్త్రచికిత్సకు మరియు కెరీర్కు పూర్తి మద్దతునిచ్చారని తెలిపారు. ప్రస్తుతం కోయంబత్తూరు జిల్లా క్రికెట్ అసోసియేషన్ (CDCA) ఆధ్వర్యంలో లీగ్ మ్యాచ్లకు అంపైరింగ్ బాధ్యతలు నిర్వహిస్తున్న రితికా, తన పట్టుదలతో ఎంతోమందికి స్ఫూర్తిగా నిలుస్తున్నారు.
