LIC షేర్లు 50 శాతం ఢమాల్.. కారణం ఇదే!
దేశీయ స్టాక్ మార్కెట్లో ప్రభుత్వరంగ బీమా దిగ్గజం లైఫ్ ఇన్సూరెన్స్ కార్పొరేషన్ షేరు ధర సగానికి పడిపోవడం సంచలనం రేపింది.
దిశ, వెబ్ డెస్క్ : దేశీయ స్టాక్ మార్కెట్లో ప్రభుత్వరంగ బీమా దిగ్గజం లైఫ్ ఇన్సూరెన్స్ కార్పొరేషన్ (LIC) షేరు ధర సగానికి పడిపోవడం సంచలనం రేపింది. శుక్రవారం నాటి ట్రేడింగ్ సెషన్లో LIC షేర్ ఒక్కసారిగా 50 శాతం మేర క్షీణించినట్లు కనిపించడం ఇన్వెస్టర్లలో తీవ్ర చర్చకు దారితీసింది. అయితే, ఇది కంపెనీ వ్యాపార నష్టాల వల్ల జరిగింది కాదు, ఎల్ఐసీ ప్రకటించిన 1:1 నిష్పత్తి బోనస్ షేర్ల (Bonus Issue) సర్దుబాటు వల్ల జరిగిన మార్పు మాత్రమే. బోనస్ ఇష్యూ గురించిన సమాచారం తెలియని సాధారణ మదుపర్లు ఈ భారీ క్షీణతను చూసి ఒక్కసారిగా ఆందోళనకు గురయ్యారు. ఎల్ఐసీ తన వాటాదారులకు ప్రతి ఒక షేరుకు (రూ. 10 ముఖ విలువ) అదనంగా మరొక షేరును ఉచితంగా అంటే బోనస్గా ఇవ్వాలని నిర్ణయించింది. మే 29ని ఇందుకు సంబంధించిన రికార్డు తేదీగా నిర్ణయించడంతో, శుక్రవారం నాటి ట్రేడింగ్లో బోనస్ షేర్ల ప్రభావం స్టాక్ ధరపై పడింది.
మార్కెట్ నియమాల ప్రకారం బోనస్ షేర్లు జారీ చేసినప్పుడు, షేర్ల సంఖ్య రెట్టింపు అవుతుంది కానీ కంపెనీ మొత్తం మార్కెట్ విలువ మారదు. అందుకే బుధవారం మార్కెట్ ముగిసే సమయానికి రూ. 830 గా ఉన్న ఎల్ఐసీ షేరు ధర, శుక్రవారం ఉదయానికి సరిగ్గా సగమై రూ. 417.60 వద్ద ట్రేడింగ్ను ప్రారంభించింది. పైకి చూసేందుకు షేరు ధర 50 శాతం పడిపోయినట్లు కనిపించినప్పటికీ, బోనస్ ధర సర్దుబాటు (Adjusted Price రూ. 415) ప్రకారం చూస్తే ఎల్ఐసీ శుక్రవారం కేవలం 1 శాతం లోపు మాత్రమే నష్టపోయింది. చివరకు ఈ షేరు రూ. 411 వద్ద ముగిసింది. కాబట్టి ఇన్వెస్టర్లు ఎవరూ తమ పెట్టుబడి విలువను నష్టపోలేదు, కేవలం వారి డీమ్యాట్ ఖాతాలో షేర్ల సంఖ్య మాత్రం రెట్టింపు కానుంది.
