ఘోర రోడ్డు ప్రమాదం: ట్రక్కును వ్యాన్ ఢీకొని ఏడుగురు మృతి

దిశ, వెబ్ డెస్క్: ప్రయాణికులతో వెళ్తున్న ఓ పికప్ వాహనానికి ఘోర ప్రమాదం (Fatal accident) జరిగి ఏడుగురు ప్రాణాలు కోల్పోయారు. ఈ షాకింగ్ సంఘటన పంజాబ్ రాష్ట్రంలోని ఫిరోజ్‌పూర్ జిల్లాలో శనివారం తెల్లవారుజామున చోటు చేసుకుంది. పికప్ వాహనం,ట్రక్కు పరస్పరం బలంగా ఢీకొన్నాయి. ఈ భీకర ప్రమాదంలో ఏడుగురు అక్కడికక్కడే మరణించగా, మరో 10 మందికి పైగా తీవ్రంగా గాయపడినట్లు స్థానిక పోలీసులు ధృవీకరించారు. పోలీసులు తెలిపిన వివరాల ప్రకారం.. ఫిరోజ్‌పూర్-ఫాజిల్కా రోడ్డులోని ‘జంగావాలా మోర్’ సమీపంలో ఈ ప్రమాదం చోటుచేసుకుంది. ప్రమాద సమయంలో సదరు పికప్ వాహనంలో సుమారు 25 మంది ప్రయాణికులు ఉన్నారు.

వీరంతా జలాలాబాద్ నుండి అమృత్‌సర్‌లోని ప్రముఖ ఆధ్యాత్మిక క్షేత్రమైన 'బియాస్' (Beas) కు వెళ్తుండగా ఈ దుర్ఘటన జరిగింది. ప్రమాద తీవ్రతకు పికప్ వాహనం పూర్తిగా దెబ్బతింది. సమాచారం అందుకున్న వెంటనే పోలీసులు ఘటనా స్థలానికి చేరుకుని, స్థానికుల సహాయంతో క్షతగాత్రులను చికిత్స నిమిత్తం సమీప ఆసుపత్రికి తరలించారు. క్షతగాత్రులలో కొందరి పరిస్థితి విషమంగా ఉన్నట్లు తెలుస్తోంది.