ఇటలీ చేరుకున్న ప్రధాని.. మెలోనితో భేటీ

దిశ, వెబ్ డెస్క్ : ఐదురోజుల అధికారిక విదేశీ పర్యటనలో భాగంగా భారత ప్రధాని నరేంద్ర మోడీ ఇటలీ చేరుకున్నారు. నార్వేలో పర్యటనను విజయవంతంగా ముగించుకున్న అనంతరం, ఆయన అక్కడి నుండి నేరుగా ఇటలీ రాజధాని రోమ్ (Rome) నగరానికి చేరుకున్నారు. విమానాశ్రయంలో ఇటలీ ఉన్నతాధికారులు, భారత దౌత్య ప్రతినిధులు ప్రధాని మోడీకి ఘనస్వాగతం పలికారు. మరికాసేపట్లో ఆయన ఇటలీ అధ్యక్షుడు సెర్గియో మట్టరెల్లా (Sergio Mattarella), అలాగే ఆ దేశ ప్రధానమంత్రి జార్జియా మెలోని (Giorgia Meloni) లతో వేర్వేరుగా ద్వైపాక్షిక భేటీ కానున్నారు.

ఈ పర్యటనలో ఇరు దేశాల మధ్య దౌత్య సంబంధాలను, వ్యూహాత్మక భాగస్వామ్యాన్ని, వివిధ రంగాలలో పరస్పర సహకారాన్ని మరింత పటిష్టం చేసుకోవడంపై ఇరు దేశాల అధినేతలు సుదీర్ఘంగా చర్చించనున్నారు. ఈ చర్చల్లో అత్యంత కీలకమైన అంశం 'ఇండియా - మిడిల్ ఈస్ట్ - యూరప్ ఎకనామిక్ కారిడార్' (India-Middle East-Europe Economic Corridor). ఆసియాను యూరప్‌తో అనుసంధానించే ఈ భారీ ఆర్థిక రవాణా కారిడార్ ప్రాజెక్టును వేగవంతం చేయడం, మౌలిక వసతుల కల్పనలో ఇటలీ భాగస్వామ్యంపై ఇరు దేశాలు ప్రత్యేక దృష్టి సారించనున్నాయి. ఇరు దేశాల మధ్య కుదిరిన 2025-2029 జాయింట్ యాక్షన్ ప్లాన్ (Joint Action Plan) పురోగతిపై ప్రధాని మోడీ, మెలోని సమీక్ష నిర్వహించనున్నారు. రాబోయే నాలుగేళ్లలో రక్షణ, సాంకేతికత, గ్రీన్ ఎనర్జీ, వాణిజ్య రంగాలలో అనుసరించాల్సిన ఉమ్మడి వ్యూహాలకు ఈ భేటీ ద్వారా మరింత స్పష్టత రానుంది.