లేక్ వ్యూ పార్క్ ఏరియాలో ఓపెన్ ఎయిర్ పార్టీ జోన్

దిశ, తెలంగాణ బ్యూరో: హైదరాబాద్‌లోని ఐకానిక్ నెక్లెస్ రోడ్ (పీవీఎన్ఆర్ మార్గ్), ఎన్టీఆర్ గార్డెన్స్ (ఎన్టీఆర్ మార్గ్) ప్రాంతం మరో సరికొత్త ఆకర్షణను సంతరించుకోబోతోంది. అవుట్‌డోర్ ఈవెంట్‌లు, కుటుంబ వేడుకలు, వినోదాత్మక కార్యక్రమాలను నిర్వహించుకోవడానికి వీలుగా, ఐమాక్స్ థియేటర్‌కు ఎదురుగా ఉన్న 'లేక్ వ్యూ పార్క్' వేదికగా ఒక ప్రత్యేకమైన ఓపెన్ ఎయిర్ పార్టీ జోన్ త్వరలోనే అందుబాటులోకి రానుంది. ఈ సుందరమైన సరస్సు తీరం హైదరాబాద్‌లోనే అత్యంత ప్రజాదరణ పొందిన వాటర్‌ఫ్రంట్ ఈవెంట్ డెస్టినేషన్‌లలో ఒకటిగా మారడమే కాకుండా.. సామాజిక, కార్పొరేట్ ఈవెంట్‌లకు, వేడుకలకు ఒక అద్భుతమైన వేదిక కానుందని హెచ్ఎండీఏ అధికారులు చెబుతున్నారు.

రూ.1.19 కోట్లతో..

గతంలో ఎన్టీఆర్ గార్డెన్స్ లోపల ఉన్న పార్టీ జోన్‌ను తెలంగాణ ప్రభుత్వం శాశ్వతంగా మూసివేసింది. అక్కడ 125 అడుగుల భారీ డాక్టర్ బి.ఆర్. అంబేద్కర్ విగ్రహంతో కూడిన 'అంబేద్కర్ స్క్వేర్'ను అభివృద్ధి చేయడంతో, ఆ పాత పార్టీ జోన్ ప్రజలకు అందుబాటులో లేకుండా పోయింది. ఈ నేపథ్యంలో, హైదరాబాద్ మెట్రోపాలిటన్ డెవలప్‌మెంట్ అథారిటీ (హెచ్ఎండీఏ) లేక్ వ్యూ పార్క్ వద్ద రూ. 1.19 కోట్ల వ్యయంతో సరికొత్త ఓపెన్-ఎయిర్ పార్టీ జోన్‌ను అభివృద్ధి చేసేందుకు చర్యలు ప్రారంభించింది. ఈ ప్రాజెక్టును కేవలం నాలుగు నెలల వ్యవధిలో పూర్తి చేయాలని హెచ్ఎండీఏ నిర్ణయించింది. ఈ సరికొత్త జోన్‌లో ఒక స్టేజ్ (వేదిక), గ్రీన్ రూమ్‌లు, పబ్లిక్ టాయిలెట్స్(పబ్లిక్ కన్వీనియన్స్ బ్లాక్స్), ఇతర అవసరమైన వసతులను కల్పించనున్నారు.

4నెలల్లో అందుబాటులోకి..

హైదరాబాద్‌లో అవుట్‌డోర్ ఈవెంట్ స్పేస్‌లకు (బహిరంగ వేడుకల స్థలాలకు) పెరుగుతున్న డిమాండ్‌ను తీర్చడంతో పాటు, హెచ్ఎండిఏకు అదనపు ఆదాయాన్ని సమకూర్చడంలో ఈ వేదిక కీలక పాత్ర పోషిస్తుందని అధికారులు భావిస్తున్నారు. గతంలో ఎన్టీఆర్ గార్డెన్స్, రాక్ గార్డెన్ సమీపంలోని పాపులర్ ఈవెంట్ వెన్యూకు ప్రజల నుండి మంచి స్పందన వచ్చినప్పటికీ, కొన్ని కారణాల వల్ల దానిని నిలిపివేయాల్సి వచ్చింది. ఆ అనుభవాన్ని దృష్టిలో ఉంచుకుని, ఇప్పుడు లేక్ వ్యూ పార్క్‌ను ఓపెన్-ఎయిర్ ఫంక్షన్‌ల కోసం ప్రత్యేక వేదికగా ఉపయోగించుకోవాలని హెచ్ఎండీఏ నిర్ణయించింది.

గతంలో ఎన్టీఆర్ గార్డెన్స్‌లో ఉన్న పార్టీ జోన్‌ను రోజువారీ రుసుము వసూలు చేస్తూ చిన్న చిన్న ఫంక్షన్‌లు, పుట్టినరోజు వేడుకలు,. సమావేశాలు నిర్వహించుకోవడానికి ప్రజలకు అద్దెకు ఇచ్చేవారు. అప్పట్లో ఈ పార్టీ జోన్‌కు పౌరుల నుండి విపరీతమైన డిమాండ్ ఉండేది. దీనిని దృష్టిలో ఉంచుకుని, పాత పార్టీ జోన్‌కు కేవలం కొన్ని వందల మీటర్ల దూరంలోనే ఉన్న లేక్ వ్యూ పార్క్ వద్ద సరికొత్త ఓపెన్-ఎయిర్ పార్టీ జోన్‌ను అభివృద్ధి చేయాలని హెచ్ఎండీఏ నిర్ణయించింది. కాంట్రాక్ట్ ఏజెన్సీతో ఒప్పందం కుదుర్చుకున్న తేదీ నుండి నాలుగు నెలల కాలపరిమితిలో ఈ ప్రాజెక్ట్ పనులు పూర్తి చేయాలని హెచ్ఎండీఏ నిర్ణయించింది.

సరస్సు తీర అందాలు, సులభమైన రవాణా సౌకర్యం, అత్యుత్తమ మౌలిక సదుపాయాల కలయికతో ఈ వేదిక ప్రైవేట్ ఫంక్షన్‌లకు మోస్ట్ వాంటెడ్ డెస్టినేషన్‌గా మారుతుందని అధికారులు భావిస్తున్నారు. సందర్శకులకు సరికొత్త అనుభూతిని అందించడమే కాకుండా, ఈ ప్రాజెక్ట్ ఆదాయాన్ని పెంచే ఒక అవకాశంగా మారనుందని అధికారులు చెబుతున్నారు. ఈ వేదికను ఈవెంట్ మేనేజ్‌మెంట్‌ సంస్థకు లీజుకు ఇచ్చే అవకాశం ఉంది. తద్వారా బుకింగ్‌ల ద్వారా అథారిటీకి నిరంతర ఆదాయం లభిస్తుంది.