ఒకే ఇంట్లో ముగ్గురు ప్రభుత్వ ఉద్యోగులు.. రేషన్ కార్డు జారీ పై ఎమ్మార్వో వివరణ!

దిశ, మల్దకల్: మల్దకల్ మండల కేంద్రంలో ఒకే ఇంట్లో ముగ్గురు ప్రభుత్వ ఉద్యోగాలు ఉన్న రేషన్ కార్డు జారీ పై సోషల్ మీడియాలో, కొన్ని పత్రికలలో వచ్చిన వార్తలపై స్థానిక ఎమ్మార్వో ఝాన్సీరాణి స్పందించారు. ఈ మేరకు ఆమె మాట్లాడుతూ.. మల్దకల్ మండల పరిధిలోని సద్దలోనిపల్లి గ్రామంలోని ఓ ఇంట్లో ముగ్గురు ప్రభుత్వ ఉద్యోగులు ఉన్నారు. వారికి 2018లో రేషన్ కార్డు మంజూరైంది. కానీ ఆ రేషన్ కార్డు మండలంలోని కుర్తి రావులచెరువు గ్రామంలో మంజూరు అయ్యింది.

2018 నుంచి వారు ఎక్కడ రేషన్ బియ్యం తీసుకోలేదు. అప్పటి నుంచి ఆ రేషన్ కార్డు పెండింగ్‌లోనే ఉందని తెలిపారు. డీఎస్ఓ ఆఫీస్ నుంచి ప్రతి ఆరు నెలలకు ఒకసారి బియ్యం తీసుకోని వారి యొక్క కార్డులు తొలగిస్తారు. కానీ ఎక్కడనో చిన్న పొరపాటు జరిగి ఆ కార్డు తొలగించలేదు. 2018 నుంచి వారు ఈ కేవైసీ కూడా చేయించలేదు. అందుకనే ఆ కార్డు పనిచేయడం లేదు. ఈ విషయాన్ని మాకు తెలిసిన వెంటనే ఆ గ్రామం యొక్క చౌక ధర దుకాణం డీలర్ నుంచి ఒక లెటర్ తీసుకొని ఆ కార్డుని తొలగించామని ఎమ్మార్వో ఝాన్సీ రాణి తెలిపారు.