మిడిల్ ఈస్ట్ వార్.. వివిధ దేశాధినేతలకు మోడీ ఫోన్

దిశ, వెబ్ డెస్క్ : పశ్చిమాసియాలో ఉద్రిక్త పరిస్థితులు కొనసాగుతున్న నేపథ్యంలో భారత ప్రధాని నరేంద్ర మోడీ పలు దేశాధినేతలతో వరుసగా ఫోన్‌లో మాట్లాడారు. ప్రాంతంలో యుద్ధ వాతావరణం తీవ్రతరం అవుతున్న వేళ, పరిస్థితిని సమీక్షిస్తూ శాంతి స్థాపనకు దౌత్యపరమైన ప్రయత్నాలు మరింతగా పెంచాల్సిన అవసరం ఉందని ఆయన అభిప్రాయపడ్డారు. ఈ క్రమంలో ఒమన్, మలేషియా, ఫ్రాన్స్ దేశాల నాయకులతో ప్రధాని మోడీ మాట్లాడి తాజా పరిణామాలపై చర్చించారు.

ప్రత్యేకంగా ఫ్రాన్స్ అధ్యక్షుడు ఇమ్మాన్యూల్ మక్రాన్(Emmanuel Macron)తో జరిగిన సంభాషణలో, పశ్చిమాసియాలో శాంతి, స్థిరత్వం పునరుద్ధరణ కోసం తక్షణ చర్యలు అవసరమని ఇద్దరు నాయకులు అభిప్రాయపడ్డారు. యుద్ధం మరింత విస్తరించకుండా చూడటం, పౌరుల ప్రాణాలు రక్షించడం, ప్రాంతీయ భద్రతను కాపాడటం అత్యవసరమని మోడీ స్పష్టం చేశారు. సమస్యలకు శాశ్వత పరిష్కారం కోసం యుద్ధం కాకుండా చర్చలు, దౌత్యమే సరైన మార్గమని ఆయన మరోసారి వెల్లడించారు.

పశ్చిమాసియా ప్రాంతంలో ఉద్రిక్తతలు తగ్గించేందుకు అంతర్జాతీయ సమాజం సమన్వయంతో పనిచేయాల్సిన అవసరాన్ని కూడా ప్రధాని ప్రస్తావించారు. వీలైనంత త్వరగా శాంతి నెలకొనేందుకు తీసుకోవాల్సిన చర్యలు, మానవతా సహాయం, సంభాషణా మార్గాలను బలోపేతం చేయడం వంటి అంశాలపై ఆయన పలు దేశాధినేతలతో విస్తృతంగా చర్చించినట్లు అధికార వర్గాలు తెలిపాయి. ఈ ఫోన్ సంభాషణలు పశ్చిమాసియా సంక్షోభ పరిష్కారంలో భారత్ చురుకైన దౌత్యపాత్రను మరోసారి రుజువు చేశాయి.