G7 సమ్మిట్ లో ఒమన్ నౌక దాడిని ప్రస్తావించిన మోడీ

దిశ, వెబ్ డెస్క్ : ప్రపంచ అగ్రదేశాల వేదికైన G7 సమ్మిట్‌లో భారత ప్రధాని నరేంద్ర మోడీ సముద్ర మార్గాల భద్రతపై గళమెత్తారు. ఇటీవలి కాలంలో ఒమన్ తీరం సమీపంలో వాణిజ్య నౌకలపై జరిగిన దాడుల అంశాన్ని ఆయన అంతర్జాతీయ సమ్మిట్ లో ప్రస్తావించారు. అంతర్జాతీయ వాణిజ్యానికి అత్యంత కీలకమైన ఈ సముద్ర రవాణా మార్గాల్లో తలెత్తుతున్న అశాంతిపై ప్రధాని తీవ్ర ఆందోళన వ్యక్తం చేశారు.

భారత నావికుల మృతిపై పరోక్ష ప్రస్తావన..

ఇటీవలి కాలంలో అమెరికా నౌకాదళం జరిపిన దాడుల కారణంగా ముగ్గురు భారతీయ నావికులు ప్రాణాలు కోల్పోయిన విషయాన్ని ప్రధాని నరేంద్ర మోదీ ఈ సందర్భంగా పరోక్షంగా ప్రస్తావించారు. సముద్ర మార్గాల్లో అమాయక నావికుల ప్రాణాలు బలికావడం పట్ల ఆయన ఆవేదన వ్యక్తం చేశారు. ఈ నేపథ్యంలోనే మారిటైమ్ సెక్యూరిటీ ని మరింత బలోపేతం చేయాల్సిన అవసరం ఎంతైనా ఉందని, వాణిజ్య నౌకలపై జరుగుతున్న దాడులను తక్షణమే నిలిపివేయాలని G7 దేశాల అధినేతలకు ప్రధాని పిలుపునిచ్చారు.

హార్ముజ్ జలసంధిలో స్వేచ్ఛా రవాణా అత్యవసరం!

ప్రపంచ చమురు, వస్తు రవాణాలో కీలక భూమిక పోషిస్తున్న హార్ముజ్ జలసంధి ద్వారా స్వేచ్ఛా నావికా రవాణా (Free Navigation) నిరంతరాయంగా సాగాలని ప్రధాని మోదీ ఉద్ఘాటించారు. ఈ మార్గాల్లో ఎలాంటి అడ్డంకులు సృష్టించినా అది ప్రపంచ ఆర్థిక వ్యవస్థపై తీవ్ర ప్రభావం చూపుతుందని హెచ్చరించారు. అంతర్జాతీయ చట్టాలకు లోబడి సముద్ర మార్గాల భద్రతను రక్షించడంలో అన్ని దేశాలు బాధ్యతాయుతంగా వ్యవహరించాలని కోరారు.