మిడిల్ ఈస్ట్ లో యుద్ధం.. వార్ జోన్లో 80 లక్షల మంది భారతీయుల ప్రాణాలు
మిడిల్ ఈస్ట్ యుద్ధం వలన 80 లక్షల మంది భారతీయుల ప్రాణాలకు ముప్పు ఉంది.
దిశ, వెబ్ డెస్క్ : మిడిల్ ఈస్ట్ దేశాల్లోని ఇరాన్, ఇజ్రాయెల్ మధ్య రాజుకున్న యుద్ధ జ్వాలలు ఇప్పుడు గల్ఫ్ దేశాల్లో నివసిస్తున్న లక్షలాది మంది భారతీయుల పాలిట పెను శాపంగా మారాయి. ప్రపంచంలోనే అత్యధికంగా 80 లక్షల మందికి పైగా భారతీయులు ఉపాధి, వ్యాపారం కోసం యూఏఈ, సౌదీ అరేబియా, ఖతార్, కువైట్, ఒమన్ వంటి దేశాల్లో నివసిస్తున్నారు. ఇప్పుడు ఈ ప్రాంతమంతా 'వార్ జోన్' గా మారడంతో, అక్కడ ఉన్న భారతీయుల ప్రాణాలకు తీవ్ర ముప్పు పొంచి ఉంది. ముఖ్యంగా దుబాయ్లోని పామ్ జుమ్మెరా వంటి కీలక ప్రాంతాలపై క్షిపణి శకలాలు పడటం, గగనతలంలో క్షిపణుల గర్జనలు వినిపిస్తుండటంతో ప్రవాస భారతీయులు ప్రాణాలు గుప్పెట్లో పెట్టుకొని బిక్కుబిక్కుమంటున్నారు. చాలా మంది తమ నివాసాలను వదిలి సురక్షితమైన ప్రాంతాలకు తరలి వెళ్తున్నారు.
ఈ యుద్ధం కారణంగా అంతర్జాతీయ విమానయాన రంగం పూర్తిగా స్తంభించిపోయింది. ప్రపంచంలోనే అత్యంత రద్దీగా ఉండే దుబాయ్, అబుదాబి విమానాశ్రయాలను మూసివేయడంతో వేలాది మంది భారతీయ ప్రయాణికులు ఎయిర్పోర్టుల్లోనే చిక్కుకుపోయారు. కేవలం పర్యాటకులు మాత్రమే కాకుండా, అత్యవసర పనులపై భారత్కు రావాల్సిన వారు, సెలవులకు వెళ్లాలనుకున్న కార్మికులు దిక్కుతోచని స్థితిలో ఉన్నారు. విమాన సర్వీసులు రద్దు కావడమే కాకుండా, యుద్ధం కారణంగా విమాన ప్రయాణ మార్గాలను మార్చాల్సి రావడంతో టికెట్ ధరలు కూడా ఆకాశాన్ని తాకుతున్నాయి. దీనికి తోడు, యుద్ధం సుదీర్ఘకాలం కొనసాగితే గల్ఫ్ దేశాల ఆర్థిక వ్యవస్థ దెబ్బతిని, అక్కడ పనిచేస్తున్న లక్షలాది మంది భారతీయులు తమ ఉద్యోగాలను కోల్పోయే ప్రమాదం కూడా పొంచి ఉంది.
భారత ప్రభుత్వం ఈ పరిస్థితిని అత్యంత తీవ్రంగా పరిగణిస్తోంది. ఇప్పటికే విదేశీ వ్యవహారాల మంత్రిత్వ శాఖ (MEA) గల్ఫ్ దేశాల్లోని భారత రాయబార కార్యాలయాలను అప్రమత్తం చేసింది. 24/7 పనిచేసే హెల్ప్లైన్ నంబర్లను ఏర్పాటు చేసి, భారతీయులందరినీ నిరంతరం సంప్రదింపుల్లో ఉండాలని సూచించింది. ఒకవేళ పరిస్థితి మరింత విషమిస్తే, గతంలో ఉక్రెయిన్ మరియు సూడాన్ నుండి భారతీయులను తరలించినట్లుగానే, భారీ ఎత్తున 'మెగా ఎవాక్యుయేషన్' చేపట్టేందుకు భారత నౌకాదళం, వైమానిక దళం సిద్ధంగా ఉన్నాయి. ఈ గల్ఫ్ దేశాల నుంచి వచ్చే 'రెమిటెన్స్' భారత ఆర్థిక వ్యవస్థకు వెన్నెముక వంటిది. కాబట్టి అక్కడి భారతీయుల రక్షణ, వారి ఉపాధి ప్రస్తుతం దేశానికి అత్యంత ప్రాధాన్యత కలిగిన అంశంగా మారింది.
