ఉగ్రవాదుల దాడి.. మాలి రక్షణ మంత్రి దారుణ హత్య

దిశ, వెబ్‌డెస్క్: మాలి రాజధాని బమాకో సమీపంలోని సైనిక స్థావర నగరం కాటి (Kati) లో గల రక్షణ మంత్రి నివాసంపై ఉగ్రవాదులు అత్యంత వ్యూహాత్మకంగా దాడికి దిగారు. ఈ భీకర దాడిలో ఆ దేశ రక్షణ మంత్రి జనరల్ సాడియో కమారా మరణించినట్లు ఆదివారం అధికారిక వర్గాలు ధృవీకరించాయి. కేవలం మంత్రినే కాకుండా, ఆయన నివాసంలో ఉన్న ఆయన రెండవ భార్య, ఇద్దరు మనవళ్లను కూడా ఉగ్రవాదులు కారు బాంబులు, భారీ ఆయుధాలతో పొట్టనపెట్టుకున్నారు. ఈ ఘాతుకానికి అల్-ఖైదా అనుబంధ సంస్థ JNIM (జమాత్ నుస్రత్ అల్-ఇస్లాం వాల్-ముస్లిమిన్), తువారెగ్ వేర్పాటువాద గ్రూపు FLA (అజావాద్ లిబరేషన్ ఫ్రంట్) సంయుక్తంగా బాధ్యత వహించాయి.

ఈ దాడులు కేవలం మంత్రి నివాసానికే పరిమితం కాకుండా, దేశవ్యాప్తంగా ఏకకాలంలో పలు ప్రధాన నగరాలపై జరిగాయి. రాజధాని బమాకో లోని విమానాశ్రయం, సెవారే, గావో, కిడాల్ వంటి కీలక సైనిక స్థావరాలపై ఉగ్రవాదులు మెరుపుదాడులు చేశారు. 2020లో సైనిక తిరుగుబాటు ద్వారా అధికారంలోకి వచ్చిన ప్రస్తుత ప్రభుత్వంపై ఇది ఇప్పటివరకు జరిగిన అతిపెద్ద దాడి అని విశ్లేషకులు భావిస్తున్నారు. ప్రస్తుతం మాలి ప్రభుత్వం దేశవ్యాప్తంగా రెడ్ అలర్ట్ ప్రకటించి, రాజధాని నగరంలో కఠినమైన కర్ఫ్యూ విధించింది. రక్షణ మంత్రి మరణం మాలి సైన్యానికి మరియు ప్రస్తుత పాలకులకు కోలుకోలేని దెబ్బగా మారింది.