మహారాష్ట్ర ప్రభుత్వం సంచలన నిర్ణయం.. స్కూళ్ల పరిధిలో ‘స్టింగ్’ ఎనర్జీ డ్రింక్ విక్రయాలపై నిషేధం

దిశ, వెబ్ డెస్క్: పాఠశాల విద్యార్థుల ఆరోగ్యాన్ని దృష్టిలో ఉంచుకుని మహారాష్ట్ర ప్రభుత్వం (Government of Maharashtra) ఒక కీలక నిర్ణయం తీసుకుంది. ఇటీవల దేశవ్యాప్తంగా ఉన్న మార్కెట్లో అమిత ప్రజాదరణ పొందిన ‘స్టింగ్’ (Sting) ఎనర్జీ డ్రింక్ పిల్లలకు హానికరమని తేలింది. దీంతో ఆ ఎనర్జీ డ్రింక్ అమ్మకాలపై రాష్ట్రవ్యాప్తంగా నియంత్రణలు విధించబోతున్నట్లు ప్రకటించింది. రాష్ట్రంలోని అన్ని పాఠశాలలకు (Schools) 500 మీటర్ల పరిధిలో ఈ ఎనర్జీ డ్రింక్ విక్రయాలను పూర్తిగా నిషేధించనున్నట్లు మహారాష్ట్ర ఆహార, ఔషధ పరిపాలన (FDA) శాఖ మంత్రి నరహరి జిర్వాల్ అసెంబ్లీ వేదికగా వెల్లడించారు.

ఈ ఎనర్జీ డ్రింక్‌లో కేఫీన్ (Caffeine), చక్కెర శాతాలు అధికంగా ఉండటం వల్ల, దీనిని నిరంతరం వినియోగించడం చిన్న పిల్లల మానసిక, శారీరక ఆరోగ్యంపై తీవ్ర ప్రతికూల ప్రభావం చూపుతుందని నిపుణులు హెచ్చరించారు. ఈ నేపథ్యంలోనే ప్రభుత్వం ఈ చర్యలకు ఉపక్రమించింది. అసెంబ్లీలో సభ్యులు లేవనెత్తిన ప్రశ్నలకు మంత్రి సమాధానమిస్తూ.. విద్యార్థులను ఈ తరహా డ్రింక్స్‌కు దూరంగా ఉంచేందుకు త్వరలోనే అధికారిక జీవో జారీ చేస్తామని, నిబంధనలు ఉల్లంఘించే దుకాణదారులపై కఠిన చర్యలు ఉంటాయని స్పష్టం చేశారు. ప్రభుత్వ నిర్ణయంపై తల్లిదండ్రులు, విద్యావేత్తలు హర్షం వ్యక్తం చేస్తున్నారు.