వాహనదారులకు మరో బిగ్ షాక్.. మళ్లీ పెరిగిన సీఎన్‌జీ ధర

దిశ, వెబ్ డెస్క్: ప్రభుత్వ రంగ గ్యాస్ పంపిణీ సంస్థ 'మహానగర్ గ్యాస్ లిమిటెడ్' (MGL) తీసుకున్న నిర్ణయంతో ముంబై మెట్రోపాలిటన్ రీజియన్ (MMR)లో వాహనదారులపై ఇంధన ధరల భారం మరింత పెరిగింది. కంప్రెస్డ్ నేచురల్ గ్యాస్ (CNG) ధరలను కిలోకు రూ. 2 చొప్పున పెంచింది. ఈ తాజా సవరణతో ముంబై, థానే, నవీ ముంబై, ఇతర పరిసర ప్రాంతాలలో కిలో సీఎన్‌జీ ధర రూ. 86 కు చేరింది. ఇటీవలి వారాల్లో సీఎన్‌జీ ధరలు పెరగడం ఇది రెండోసారి. అంతకుముందు మే 14న కూడా MGL కిలోకు రూ. 2 చొప్పున ధరలను పెంచిన విషయం తెలిసిందే. ఈ తాజా ధరల పెంపు వల్ల ప్రైవేట్ వాహనదారులు, టాక్సీ ఆపరేటర్లు, ప్రజా రవాణా రంగాలపై రవాణా ఖర్చులు పెరగనున్నాయి. అయితే, ధరలు పెరిగినప్పటికీ కిలోమీటరుకు అయ్యే రన్నింగ్ ఖర్చుల పరంగా చూస్తే పెట్రోల్, డీజిల్ కంటే సీఎన్‌జీ ఇప్పటికీ కొంత పొదుపుగానే ఉండటం గమనార్హం.