ఇస్రో కీలక ప్రయోగం.. నాలుగు నెలల విరామం తర్వాత నింగిలోకి GSLV-F17

దిశ, వెబ్‌డెస్క్: భారత అంతరిక్ష పరిశోధనా సంస్థ (ISRO) మరో ప్రతిష్టాత్మక ప్రయోగానికి సిద్ధమైంది. సుమారు నాలుగు నెలల విరామం తర్వాత, ఈ నెలాఖరున తిరుపతి జిల్లా శ్రీహరికోటలోని షార్ (SHAR) రెండో ప్రయోగ వేదిక నుంచి GSLV-F17 రాకెట్‌ను ప్రయోగించనున్నట్లు ఇస్రో ప్రకటించింది. ఈ రాకెట్ ద్వారా 1,117 కిలోల బరువున్న EOS-5 (Earth Observation Satellite) భూ పరిశీలన ఉపగ్రహాన్ని కక్ష్యలోకి పంపనున్నారు. ఈ ఉపగ్రహం భూమిపై జరిగే మార్పులను, వాతావరణ పరిస్థితులను పర్యవేక్షించడంలో కీలక పాత్ర పోషించనున్నట్లు తెలుస్తుంది.

గతంలో జరిగిన కొన్ని వైఫల్యాలను దృష్టిలో ఉంచుకుని శాస్త్రవేత్తలు ఈ ప్రయోగాన్ని అత్యంత ప్రతిష్టాత్మకంగా తీసుకున్నారు. గత ఏడాది మే నెలలో ప్రయోగించిన PSLV-C 61, ఈ ఏడాది జనవరిలో చేపట్టిన PSLV-C 62 రాకెట్ ప్రయోగాలు ఆశించిన ఫలితాన్ని ఇవ్వలేదు. ఈ నేపథ్యంలో, ప్రస్తుత GSLV-F17 రాకెట్‌లోని అన్ని దశల పనితీరును, సాంకేతిక అంశాలను ఇస్రో శాస్త్రవేత్తలు నిశితంగా పరిశీలిస్తున్నారు. ఈ ప్రయోగం విజయవంతం కావడం ఇస్రో భవిష్యత్ ప్రాజెక్టులకు ఎంతో కీలకం కానున్నట్లు విశ్లేషకులు చెబుతున్నారు.