అమల్లోకి భారత్ - యూకే ఫ్రీ ట్రేడ్ డీల్.. భారీగా తగ్గనున్న ధరలు

దిశ, వెబ్ డెస్క్ : భారత్ - బ్రిటన్ (UK) దేశాల మధ్య కుదిరిన చారిత్రాత్మక స్వేచ్ఛా వాణిజ్య ఒప్పందం (FTA - Free Trade Agreement) నేటి నుండి అధికారికంగా అమల్లోకి వచ్చింది. ఇటీవల జరిగిన జీ7 (G7) సదస్సులో భాగంగా బ్రిటన్ ప్రధాని కీర్ స్టార్మర్‌తో భారత ప్రధాని నరేంద్ర మోడీ జరిపిన ద్వైపాక్షిక భేటీ అనంతరం ఈ ఒప్పందానికి సంబంధించిన తుది ఆమోదం లభించింది. ఈ ఒప్పందం ద్వారా ఇరు దేశాల మధ్య ద్వైపాక్షిక వాణిజ్యం సరికొత్త గరిష్ఠాలకు చేరుకోవడమే కాకుండా, ఎగుమతి-దిగుమతి సుంకాలు భారీగా తగ్గనున్నాయి. అలాగే రెండు దేశాల మధ్య ట్రేడ్ వాల్యూ 2030 నాటికి 56 బిలియన్ డాలర్ల నుంచి 100 బిలియన్ డాలర్లకు పెంచడమే ఈ ఒప్పందం మరో కీలక లక్ష్యం కూడా.

భారతీయ ఎగుమతులపై 'జీరో డ్యూటీ'

ఈ ఒప్పందం ప్రకారం భారతదేశం నుండి బ్రిటన్‌కు ఎగుమతి అయ్యే 99% పైగా వస్తువులపై యూకే ప్రభుత్వం పూర్తి సుంకం రాయితీ (Zero Duty) కల్పించింది. దీనివల్ల యూకే మార్కెట్‌లో భారతీయ వస్తువుల ధరలు గణనీయంగా తగ్గి, చైనా మరియు ఇతర దేశాల ఉత్పత్తులతో పోటీ పడేలా మన ఎగుమతులు పెరగనున్నాయి. ప్రధానంగా టెక్స్‌టైల్స్ & గార్మెంట్స్ లోని భారతీయ చేనేత, వస్త్ర రంగానికి భారీ ఊతం లభిస్తుంది. తోలు వస్తువుల ఎగుమతులు పుంజుకుంటాయి. రత్నాలు, ఆభరణాల రంగానికి సరికొత్త మార్కెట్ లభిస్తుంది. పారిశ్రామిక ఉత్పత్తుల ఎగుమతి సులభతరం అవుతుంది. సముద్ర ఆహార ఉత్పత్తులు, ప్యాక్డ్ ఫుడ్స్‌కు డిమాండ్ పెరుగుతుంది.

సర్వీసెస్ సెక్టర్, 'సోషల్ సెక్యూరిటీ' నిబంధన

కేవలం వస్తువుల మార్పిడి మాత్రమే కాకుండా, సేవల రంగంలో (Services Sector) ఈ ఒప్పందం భారతీయులకు పెద్ద ఊరటనిచ్చింది. ఐటీ (IT) నిపుణులు, ఇంజనీర్లు, డాక్టర్లు, ఇతర నైపుణ్యం కలిగిన ప్రొఫెషనల్స్‌కు బ్రిటన్‌లో ఉపాధి అవకాశాలు సులభతరం అవుతాయి. సోషల్ సెక్యూరిటీ అగ్రిమెంట్ ప్రకారం యూకేలో తాత్కాలిక ప్రాజెక్టుల కోసం పని చేసే భారతీయ ఉద్యోగులు 5 సంవత్సరాల వరకు డబుల్ సోషల్ సెక్యూరిటీ కంట్రిబ్యూషన్ అంటే రెండు దేశాల్లోనూ చెల్లించే సామాజిక భద్రతా పన్నులు ఇకపై చెల్లించాల్సిన అవసరం లేదు. దీనివల్ల భారతీయ కంపెనీలకు, ఉద్యోగులకు భారీగా ఖర్చు తగ్గుతుంది.

ఏ వస్తువుల ధరలు తగ్గుతాయి?

బ్రిటన్ నుండి భారతదేశానికి దిగుమతి అయ్యే వస్తువుల పన్నులలో మార్పులు చేయడం వల్ల భారతీయ మార్కెట్లో ఉత్పత్తుల ధరలు తగ్గనున్నాయి. పరిశ్రమల్లో వాడే అత్యాధునిక బ్రిటీష్ యంత్రాల, వాటి విడి భాగాల ధరలు తగ్గుతాయి. బ్రిటన్ నుండి వచ్చే లగ్జరీ కార్లు, ఇతర వాహనాల ధరలు భారీగా తగ్గనున్నాయి. యూకేకు చెందిన బ్రాండెడ్ ఆహార పదార్థాలు, చాక్లెట్లు, పండ్ల ధరలు దిగివస్తాయి.