భారీ పేలుడు.. భార్యాభర్తలతో సహా ముగ్గురు మృతి
ఇంటి నిర్మాణం కోసం తవ్వకాలు చేస్తుండగా భారీ పేలుడు సంభవించి.. ముగ్గురు ప్రాణాలు కోల్పోయారు.
దిశ, వెబ్ డెస్క్: ఇంటి నిర్మాణం కోసం తవ్వకాలు చేస్తుండగా భారీ పేలుడు (Huge explosion) సంభవించి.. ముగ్గురు ప్రాణాలు కోల్పోయారు. ఈ షాకింగ్ సంఘటన జార్ఖండ్లోని హజారీబాగ్ జిల్లాలో ఈ రోజు సాయంత్రం చోటు చేసుకుంది. పోలీసుల సమాచారం మేరకు హబీబ్ నగర్ ప్రాంతంలోని ఒక నిర్మాణ స్థలంలో (లేదా ఖాళీ ప్లాట్లో) చెత్తను తొలగించి తవ్వకాలు చేస్తున్న సమయంలో భారీ పేలుడు జరిగింది. ఈ ప్రమాదంలో ఒకే కుటుంబానికి చెందిన భార్యాభర్తలు, మరో మహిళ ప్రాణాలు కోల్పోయారు. పునాది కోసం భూమిని తవ్వుతున్న సమయంలో ఈ పేలుడు సంభవించినట్లు ప్రాథమిక సమాచారం అందుతోంది. పేలుడు ధాటికి ఆ ప్రాంతమంతా ఒక్కసారిగా దద్దరిల్లిపోవడంతో స్థానికులు భయాందోళనలకు గురయ్యారు.
ఘటనపై సమాచారం అందుకున్న వెంటనే పోలీసులు, ఫోరెన్సిక్ బృందాలు రంగంలోకి దిగాయి. పేలుడుకు గల ఖచ్చితమైన కారణాలు, పేలుడు పదార్థం స్వభావాన్ని గుర్తించేందుకు అధికారులు దర్యాప్తు చేస్తున్నారు. "పేలుడు ఎలా జరిగిందనే దానిపై ప్రస్తుతం ఆరా తీస్తున్నాం, పూర్తి వివరాలు సేకరిస్తున్నాం" అని జార్ఖండ్ పోలీసు అధికార ప్రతినిధి, ఐజీ ఆపరేషన్స్ మైఖేల్ రాజ్ ఎస్ తెలిపారు. ప్రమాద స్థలంలో లభించిన ఆధారాలను బట్టి ఇది బాంబు పేలుడా లేక భూమిలో ఉన్న పాత పేలుడు పదార్థాల వల్ల జరిగిందా అనే కోణంలో విచారణ చేస్తున్నట్లు తెలిపారు.
