ఊపిరి బిగబట్టే ఉత్కంఠకు హ్యాపీ ఎండ్.. బోర్‌వెల్ నుండి సురక్షితంగా నాలుగేళ్ల చిన్నారి

దిశ, వెబ్ డెస్క్: బోర్‌వెల్‌లో పడిపోయిన నాలుగేళ్ల బాలుడి ఉదంతం సుఖాంతమైంది. పంజాబ్‌లోని హోషియార్‌పూర్ జిల్లాలో శుక్రవారం సాయంత్రం చక్ సమాన గ్రామంలో గుర్కరన్ సింగ్ (Gurkaran Singh) అనే చిన్నారి తన ఇంటి సమీపంలో ఆడుకుంటూ, కొత్తగా తవ్విన బోర్‌వెల్‌ (Borewell)లో ప్రమాదవశాత్తూ పడిపోయాడు. బాలుడు బోర్‌వెల్ పైపునకు, పక్కనే ఉన్న మట్టి గోడకు మధ్య ఉన్న సందులో దాదాపు 25 నుండి 30 అడుగుల లోతులో చిక్కుకుపోయాడు. ఈ సమాచారం అందిన వెంటనే జిల్లా యంత్రాంగం, పంజాబ్ పోలీస్, ఎన్డీఆర్‌ఎఫ్ (NDRF), ఎస్డీఆర్‌ఎఫ్ (SDRF) బృందాలు ఘటనా స్థలానికి చేరుకుని యుద్ధప్రాతిపదికన రెస్క్యూ ఆపరేషన్ ప్రారంభించాయి.

లోపల మట్టి విరిగి పడుతుండటం, కొద్దిగా నీరు చేరడంతో రెస్క్యూ ఆపరేషన్ (Rescue operation) అత్యంత సవాలుగా మారింది. అధికారులు జేసీబీ యంత్రాల సహాయంతో బోర్‌వెల్‌కు సమాంతరంగా లోతైన గుంతను తవ్వి, చిన్నారికి పైపుల ద్వారా నిరంతరం ఆక్సిజన్‌ను అందించారు. సుమారు 9 గంటల పాటు ఊపిరి బిగబట్టే ఉత్కంఠ నడుమ సాగిన ఈ పోరాటం తర్వాత శనివారం తెల్లవారుజామున 12:40 గంటల సమయంలో రెస్క్యూ సిబ్బంది గుర్కరన్‌ను సురక్షితంగా బయటకు తీశారు. అనంతరం చిన్నారిని అంబులెన్స్‌లో ఆసుపత్రికి తరలించగా, ప్రస్తుతం బాలుడి ఆరోగ్యం స్థిరంగా ఉందని వైద్యులు ప్రకటించడంతో అందరూ ఊపిరి పీల్చుకున్నారు.