ప్రభుత్వ ఆసుపత్రి సేవలను ప్రజలకు చేరువ చేయాలి

దిశ, గోదావరిఖని : ప్రభుత్వ ఆసుపత్రుల్లో అందుబాటులో ఉన్న ప్రత్యేక వైద్య సేవలను ప్రజలకు మరింత చేరువ చేసి, వాటిపై విస్తృత ప్రచారం నిర్వహించాలని జిల్లా కలెక్టర్ కోయ శ్రీహర్ష వైద్యాధికారులను ఆదేశించారు. శుక్రవారం రామగుండం ప్రభుత్వ జనరల్ ఆసుపత్రి (జీజీహెచ్)ను ఆకస్మికంగా తనిఖీ చేసిన కలెక్టర్, ఆసుపత్రిలో అందిస్తున్న ప్రత్యేక వైద్య సేవలు, చికిత్సా సౌకర్యాలు, వైద్యుల అందుబాటు, మౌలిక వసతులను పరిశీలించారు. ఈ సందర్భంగా కలెక్టర్ మాట్లాడుతూ.. ప్రభుత్వ ఆసుపత్రుల్లో అత్యాధునిక సౌకర్యాలతో అనేక ప్రత్యేక వైద్య సేవలు అందుబాటులో ఉన్నప్పటికీ, వాటిపై ప్రజలకు సరైన అవగాహన లేకపోవడం వల్ల ప్రైవేట్ ఆసుపత్రులను ఆశ్రయించి అనవసరంగా అధిక వ్యయం చేస్తున్నారని అన్నారు. ప్రభుత్వ ఆసుపత్రుల్లో లభిస్తున్న సేవలపై గ్రామాలు, పట్టణాల్లో విస్తృత ప్రచార కార్యక్రమాలు చేపట్టాలని సూచించారు.

ప్రభుత్వ ఆసుపత్రుల్లో నాణ్యమైన వైద్య సేవలు ఎక్కువ మంది ప్రజలకు అందించడమే ప్రభుత్వ లక్ష్యమని పేర్కొన్న ఆయన, ప్రజలు ప్రభుత్వ ఆసుపత్రులపై విశ్వాసం పెంచుకుని అందుబాటులో ఉన్న సేవలను పూర్తిస్థాయిలో వినియోగించుకోవాలని కోరారు. ప్రతి ప్రత్యేక వైద్య విభాగానికి సంబంధించిన సేవలు, వైద్యుల అందుబాటు రోజులు, చికిత్సల వివరాలను ఆసుపత్రి ఆవరణలో స్పష్టంగా ప్రదర్శించాలని ఆదేశించారు. తనిఖీ సందర్భంగా న్యూరో సర్జరీ విభాగాన్ని పరిశీలించిన కలెక్టర్, వెన్నెముక, మెడ సంబంధిత సమస్యలు, తలకు గాయాలైన రోగులకు అందిస్తున్న చికిత్సలపై వివరాలు తెలుసుకున్నారు. న్యూరో సర్జన్ ప్రతి **బుధవారం, శుక్రవారం** సేవలు అందిస్తున్నట్లు అధికారులు తెలిపారు.

ఫిజియోథెరపీ విభాగంలో ప్రమాదాలు, పక్షవాతం, కీళ్ల నొప్పులు, శస్త్రచికిత్సల అనంతర పునరావాస సేవలు పొందుతున్న రోగులతో మాట్లాడి వారి అభిప్రాయాలను తెలుసుకున్నారు. 2డీ ఎకో విభాగాన్ని పరిశీలించి గుండె సంబంధిత పరీక్షలు సోమవారం నుంచి శనివారం వరకు ఉదయం 9 గంటల నుంచి సాయంత్రం 4 గంటల వరకు అందుబాటులో ఉన్నాయని అధికారులు వివరించారు. ఏటీఎఫ్ (Addiction Treatment Facility) కేంద్రాన్ని సందర్శించిన కలెక్టర్ మద్యం, మాదకద్రవ్యాలు, గంజాయి వ్యసనానికి చికిత్స, కౌన్సెలింగ్, పునరావాస సేవలను మరింత సమర్థవంతంగా అందించాలని సూచించారు. పీడియాట్రిక్ సర్జరీ విభాగంలో పిల్లలకు హెర్నియా, తీవ్రమైన కడుపు నొప్పి, తిత్తులు, చీము గడ్డల డ్రైనేజీ వంటి సమస్యలకు నిర్వహిస్తున్న శస్త్రచికిత్సలపై ఆరా తీశారు. యూరాలజీ విభాగంలో ఫిమోసిస్, మూత్రనాళ సమస్యలు, స్టెనోసిస్ వంటి వ్యాధులకు చికిత్స అందిస్తున్నట్లు అధికారులు వివరించగా, యూరాలజీ నిపుణులు ప్రతి **మంగళవారం, గురువారం** అందుబాటులో ఉంటారని తెలిపారు.

ప్రభుత్వ ఆసుపత్రుల్లో అందుబాటులో ఉన్న ప్రతి ప్రత్యేక వైద్య సేవపై ప్రజలకు స్పష్టమైన సమాచారం చేరేలా ప్రచార కార్యక్రమాలు చేపట్టాలని, ఎక్కువ మంది రోగులు ప్రభుత్వ వైద్య సేవలను వినియోగించుకునేలా చర్యలు తీసుకోవాలని కలెక్టర్ ఆదేశించారు. ప్రభుత్వ ఆసుపత్రులు ప్రజల ఆరోగ్య భద్రతకు ప్రధాన కేంద్రాలుగా నిలవాలని, నాణ్యమైన వైద్య సేవలతో ప్రజల విశ్వాసాన్ని మరింత పెంచాలని సూచించారు. ఈ కార్యక్రమంలో మెడికల్ కాలేజ్ సూపరింటెండెంట్ డా.హిమబిందు సింగ్, సీఎస్‌ఆర్‌ఎంఓ డా. కృపాబాయి, డా. అప్పారావు, ఇతర వైద్యులు, సంబంధిత అధికారులు పాల్గొన్నారు.