తెలుగు రాష్ట్రాల ప్రజలకు చల్లని కబురు.. బంగాళాఖాతంలో అల్పపీడనం

దిశ, వెబ్ డెస్క్: భారీ ఎండలతో సతమతమవుతున్న తెలుగు రాష్ట్రాల ప్రజలకు వాతావరణ శాఖ (Department of Meteorology) శుభవార్త అందించింది. నైరుతి బంగాళాఖాతంలో ఈ నెల రెండో వారంలో ఉపరితల ఆవర్తనం (Surface periodicity) ఏర్పడనుందని, దాని ప్రభావంతో మే 11 - 12 తేదీల్లో అల్పపీడనం బలపడే అవకాశం ఉందని ఇస్రో వాతావరణ నిపుణులు (ISRO weather experts) వెల్లడించారు. ఈ అల్పపీడన ప్రభావంతో ఆంధ్రప్రదేశ్, తెలంగాణ రాష్ట్రాల్లో విస్తారంగా వర్షాలు కురిసే అవకాశం ఉండటంతో, ఎండల తీవ్రత నుంచి ఉపశమనం లభించనుంది.

మరోవైపు, ప్రస్తుతం కొనసాగుతున్న ద్రోణి ప్రభావం (Trough effect)తో ఇప్పటికే రెండు రాష్ట్రాల్లోని పలు జిల్లాల్లో వాతావరణం చల్లబడింది. రాబోయే 48 గంటల పాటు తెలుగు రాష్ట్రాల్లో అక్కడక్కడ ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని అధికారులు తెలిపారు. అల్పపీడనం గనుక బలపడితే మే రెండో వారంలో భారీ వర్షాలు కురిసే సూచనలు ఉన్నాయని, ఇది వేసవి తాపం నుంచి ప్రజలకు పెద్ద ఊరటనిస్తుందని వాతావరణ నిపుణులు పేర్కొంటున్నారు.