కూకట్పల్లికి క్లాస్.. మూసాపేట్కు మాస్
జీహెచ్ఎంసీలో భాగంగా ఉన్నప్పుడు ఆ సర్కిల్లో పోస్టింగ్ అంటే చాలు ముఖ్యమంత్రుల నుంచి స్థానిక ఎమ్మెల్యేల వరకు ఉన్న రాజకీయ పలుకుబడిని వినియోగించుకుని బదిలి చేయించుకుని సీటు దక్కించుకునే వారు అధికారులు.
దిశ, కూకట్పల్లి : జీహెచ్ఎంసీలో భాగంగా ఉన్నప్పుడు ఆ సర్కిల్లో పోస్టింగ్ అంటే చాలు ముఖ్యమంత్రుల నుంచి స్థానిక ఎమ్మెల్యేల వరకు ఉన్న రాజకీయ పలుకుబడిని వినియోగించుకుని బదిలి చేయించుకుని సీటు దక్కించుకునే వారు అధికారులు. జీహెచ్ఎంసీ విభజన తర్వాత ఒక్కసారిగా ఆ సర్కిల్కు ఉన్న క్రేజ్ తగ్గింది. ఆ సర్కిల్లో పోస్టింగ్ అంటేనే అధికారులు విముఖత చూపించడం, ఉన్నతాధికారులు బదిలి చేసిన ఏదో సాకుతో సెలవు పెట్టి వెళుతున్నారు. గ్రేటర్ హైదరాబాద్ కమిషనరేట్ అంతర్భాగంలో ఒక వెలుగు వెలిగిన సర్కిల్ మూసాపేట్, మిని ఇండియాగా, ఆసియాలోనే అతిపెద్ద కాలనీగా పేరుగాంచిన కేపీహెచ్బీ కాలనీ, బాలాజీనగర్, మూసాపేట్ గ్రామం, అల్లాపూర్, గాయత్రి నగర్, మోతీ నగర్ ప్రాంతాలతో కూడి ఉండేది.
జీహెచ్ఎంసీని మూడు కార్పొరేషన్లుగా విభజించిన ప్రభుత్వం కొత్తగా సైబరాబాద్ మున్సిపల్ కార్పొరేషన్ను ఏర్పాటు చేసింది. అదే విధంగా కూకట్పల్లి జోన్లోని సర్కిళ్లను పునర్ విభజించారు. ఈ క్రమంలో మూసాపేట్ గ్రామం పరిధిని మూసాపేట్ సర్కిల్గా, కూకట్పల్లి గ్రామం పరిధిలోని ప్రాంతాన్ని కూకట్పల్లి సర్కిల్గా ఏర్పాటు చేశారు. దానికి తోడు శేరిలింగంపల్లిలోని మాధాపూర్ను, ఆల్విన్ కాలనీ సర్కిళ్లను కూకట్పల్లి జోన్లో కలిపారు. ఇదిలా ఉండగా మూసాపేట్ సర్కిల్లో గతంలో ఉన్న కేపీహెచ్బీ కాలనీ, బాలాజీనగర్, వసంత్నగర్, జేఎన్టీయూ, సర్దార్ పటేల్ నగర్, ఎన్ఆర్ఎస్ఏ కాలనీ, సీబీసీఐడీ కాలనీ ఇలా ధనవంతులు నివాసం ఉండే గేటెడ్ కమ్యునిటీలు, పెద్ద కాలనీలు మూసాపేట్ సర్కిల్ నుంచి తొలగించి కూకట్పల్లి సర్కిల్గా చేశారు.
మూసాపేట్ సర్కిల్లో వార్డులు..
1. మూసాపేట్.
2. మోతీనగర్.
3. బాలానగర్.
4. ప్రశాంత్నగర్.,
5. అల్లాపూర్.
కూకట్ పల్లి సర్కిల్ పరిధిలో వార్డులు..
1. కూకట్పల్లి.
2. కేపీహెచ్బీ కాలనీ.
3. వసంత్నగర్.
4. కైత్లాపూర్
5. బాలాజీ నగర్
6. గాయత్రి నగర్.
కాసులు లేని సర్కిల్లో పని చేయలేమంటున్న అధికారులు..
మూసాపేట్ సర్కల్ పూర్తిగా స్లమ్ ప్రాంతంతో కూడి ఉంది. పెద్దగా రెవెన్యూ లేని ప్రాంతాలను, కనీసం ఆస్తి పన్ను కూడా వసూలు కానీ ప్రాంతాలతో ఉండటంతో అధికారులు మూసాపేట్ సర్కిల్లో పని చేయడానికి సుముఖత చూపడం లేదు. డిసెంబర్లో సీఎంసీ ఏర్పడిన నాటి నుంచి ఆరు నెలల కాలంలో ఇప్పటికి నలుగురు డీసీలు బదిలీ అయ్యారు. ఇప్పుడు తాజాగా 4వ డీసీ బాధ్యతలు చెపడుతున్నారు. ఇద్దరు పక్క సర్కిల్లో ఖాళీ అవడంతో బదిలి చేయించుకోగా ఒకరు మాత్రం నెల రోజుల లోపే బదిలీ చేయించుకుని సొంత ఊరికి వెళ్లినట్టు సమాచారం. అంతే కాకుండా మూసాపేట్ సర్కిల్లోని ఇంజనీరింగ్, ఎంటమాలజీ, ఎన్ఫోర్స్మెంట్, పారిశుధ్య విభాగం, టౌన్ప్లానింగ్, రెవెన్యూ ఇలా వివిధ శాఖల అధికారులు వేరే సర్కిళ్లకు బదిలి చేయించు కోవడానికి పైరవీలు చేస్తున్నట్టు చర్చ జరుగుతుంది.
మూసాపేట్, కూకట్పల్లి సర్కిళ్ల మార్పు తప్పదా..?
గతంలో ఉన్న విధంగా మూసాపేట్, కూకట్పల్లి సర్కిళ్ల పరిధిని కొంత స్లమ్, కొంత క్లాస్ కాలనీలను కలుపుతూ సర్కిల్లను ఏర్పాటు చేయాలన్న డిమాండ్ పెరుగుతుంది. పూర్తిగా స్లమ్ ప్రాంతంతో మూసాపేట్, క్లాస్ కాలనీలతో కూకట్పల్లి సర్కిల్ ఏర్పాటుతో అధికారులు, సిబ్బంది గగ్గోలు పెడుతున్నారు. ఈ విషయం పై సీఎంసీ అధికారులు, ప్రభుత్వం ప్రత్యేక దృష్టి సారించాలని పలువురు సిబ్బంది అభిప్రాయపడుతున్నారు.
