కర్ణాటకలో ఘోర ప్రమాదం.. ఏపీకి చెందిన ముగ్గురు మృతి

దిశ, వెబ్ డెస్క్: ఎదురెదురుగా వస్తున్న రెండు కార్లు ఢీకొనడంతో ముగ్గురు అక్కడికక్కడే మృతి చెందగా, మరో ముగ్గురు తీవ్రంగా గాయపడ్డారు. ఈ షాకింగ్ సంఘటన కర్ణాటక రాష్ట్రంలోని తుంకూర్ జిల్లాలో చోటుచేసుకుంది. ప్రమాదంలో మృతి చెందిన వారిని ఆంధ్రప్రదేశ్‌లోని కర్నూలు జిల్లా ఆదోనికి చెందిన గజేశ్వర్ (65), ఇందిరా (55), సౌమ్య (35)గా పోలీసులు గుర్తించారు. ఈ ఘటనలో తీవ్రంగా గాయపడిన మరో ముగ్గురిని సమీప ఆసుపత్రికి తరలించి చికిత్స అందిస్తున్నారు. వారి ఆరోగ్య పరిస్థితిపై వైద్యులు పర్యవేక్షణ కొనసాగిస్తున్నారు. ప్రమాద సమాచారం అందుకున్న పోలీసులు వెంటనే సంఘటనా స్థలానికి చేరుకుని సహాయక చర్యలు చేపట్టారు. మృతదేహాలను పోస్టుమార్టం నిమిత్తం ఆస్పత్రికి తరలించారు. ఈ ప్రమాదానికి గల కారణాలపై పోలీసులు కేసు నమోదు చేసి దర్యాప్తు ప్రారంభించారు. ప్రమాదం ఎలా జరిగిందనే అంశంపై పూర్తి వివరాలు తెలియాల్సి ఉంది.