ఆఫ్ఘనిస్తాన్లో భూకంపం.. 4.6 తీవ్రతతో వణికిన హిందూకుష్ ప్రాంతం
ఆఫ్ఘనిస్తాన్లో 4.6 తీవ్రతతో భూకంపం! వరదలు, భూకంపాల వల్ల 35 మంది మృతి. బాధితులను ఆదుకునేందుకు భారత్ మానవతా సాయం.
దిశ, వెబ్ డెస్క్: ఆఫ్ఘనిస్తాన్లో ఆదివారం తెల్లవారుజామున భూకంపం (Earthquake) సంభవించింది. రిక్టర్ స్కేలుపై దీని తీవ్రత 4.6గా నమోదైనట్లు నేషనల్ సెంటర్ ఫర్ సీస్మోలజీ (NCS) వెల్లడించింది. భారత కాలమానం ప్రకారం ఉదయం 5:29 గంటలకు భూమి కంపించిందని, భూ అంతర్భాగంలో 150 కిలోమీటర్ల లోతులో దీని కేంద్రం ఉన్నట్లు అధికారులు గుర్తించారు. ప్రధానంగా హిందూకుష్ పర్వత ప్రాంతం seismic zone (భూకంప ప్రభావిత ప్రాంతం)లో ఉండటం, భారత, యురేసియన్ టెక్టోనిక్ ప్లేట్ల ఘర్షణ కారణంగా ఇక్కడ తరచుగా భూకంపాలు సంభవిస్తున్నాయని నిపుణులు విశ్లేషిస్తున్నారు.
విపత్తు గుప్పిట్లో ఆఫ్ఘన్ - భారత్ మానవతా దృక్పథం
గడిచిన కొద్ది రోజులుగా ఆఫ్ఘనిస్తాన్ను ప్రకృతి వైపరీత్యాలు అతలాకుతలం చేస్తున్న విషయం తెలిసిందే. భూకంపాలతో పాటు భారీ వర్షాలు, వరదల కారణంగా ఇప్పటివరకు 35 మంది మరణించగా, 52 మంది గాయపడినట్లు అక్కడి విపత్తు నిర్వహణ సంస్థ తెలిపింది. సుమారు 131 ఇళ్లు పూర్తిగా ధ్వంసం కాగా, వందలాది ఇళ్లు పాక్షికంగా దెబ్బతిన్నాయి. ఈ క్లిష్ట సమయంలో భారత్ తన మానవతా దృక్పథాన్ని చాటుకుంది. బాధితుల కోసం కిచెన్ సెట్లు, హైజీన్ కిట్లు, ప్లాస్టిక్ షీట్లు, స్లీపింగ్ బ్యాగులు వంటి నిత్యావసర సామగ్రిని ఇప్పటికే భారత్ పంపిణీ చేసింది. "ఆఫ్ఘన్ ప్రజలకు భారత్ ఎల్లప్పుడూ అండగా ఉంటుంది" అని విదేశీ వ్యవహారాల శాఖ ప్రతినిధి రణధీర్ జైస్వాల్ స్పష్టం చేశారు.
