83 డాలర్లకు చేరిన బ్యారెల్ క్రూడ్ ఆయిల్ ధర

దిశ, వెబ్ డెస్క్ : పశ్చిమాసియాలో నెలకొన్న యుద్ధ వాతావరణం అంతర్జాతీయ చమురు మార్కెట్‌ను కుదిపేస్తోంది. ఇరాన్ యుద్ధం కారణంగా ముడి చమురు (Crude Oil) ధరలు రికార్డు స్థాయికి చేరుకుంటున్నాయి. తాజా గణాంకాల ప్రకారం.. బ్రెంట్ క్రూడ్ ధర బ్యారెల్‌కు 82.66 డాలర్ల వద్ద కొనసాగుతోంది. ఈ ఒక్క వారంలోనే బ్రెంట్ క్రూడ్ ధర ఏకంగా 12% మేర పెరగడం గమనార్హం. ఈ ధోరణి ఇలాగే కొనసాగితే త్వరలోనే ఇది 100 డాలర్ల మార్కును చేరుకుంటుందని ఆర్థిక నిపుణులు హెచ్చరిస్తున్నారు.

ట్రంప్ హామీతో నెమ్మదించిన పెరుగుదల

చమురు ధరలు ఆకాశాన్ని తాకుతున్న తరుణంలో, అమెరికా అధ్యక్షుడు డొనాల్డ్ ట్రంప్ చేసిన ప్రకటన మార్కెట్‌లో కొంత ఉపశమనాన్ని కలిగించింది. ఇంధన సరఫరాలో ఎటువంటి ఆటంకాలు కలగకుండా చూస్తామని ఆయన హామీ ఇచ్చారు. ముఖ్యంగా అత్యంత కీలకమైన హార్మూజ్ జలసంధిలో నౌకల ప్రయాణానికి తమ సైన్యం పూర్తి రక్షణ కల్పిస్తుందని ట్రంప్ భరోసా ఇవ్వడంతో ధరల పెరుగుదల వేగం కొంత తగ్గింది.

భారత్‌పై తీవ్ర ప్రభావం

ముడి చమురు ధరల పెరుగుదల భారతదేశం వంటి దేశాలకు పెద్ద తలనొప్పిగా మారనుంది. ఎందుకంటే భారత్ తన ఇంధన అవసరాల కోసం 80% సౌదీ అరేబియా నుంచి వచ్చే దిగుమతులపైనే ఆధారపడుతోంది. అంతర్జాతీయంగా ధరలు పెరిగితే, దేశీయంగా పెట్రోల్, డీజిల్ ధరలు పెరిగి రవాణా ఖర్చులు ఆకాశాన్ని తాకుతాయి. ఇది పరోక్షంగా నిత్యావసర వస్తువుల ధరల పెరుగుదలకు దారితీసి సామాన్యుడిపై తీవ్రమైన ఆర్థిక భారాన్ని మోపుతుంది. ప్రస్తుత పరిస్థితుల్లో ప్రపంచవ్యాప్తంగా సప్లై చైన్ దెబ్బతినకుండా ఉండాలంటే అమెరికా, ఇతర దేశాల మధ్యవర్తిత్వం అత్యంత కీలకం కానుంది.