తహసీల్దార్ కార్యాలయంలో నాగుపాము కలకలం

దిశ, బయ్యారం : బయ్యారం మండల కేంద్రంలోని తహసీల్దార్ కార్యాలయంలో బుధవారం సాయంత్రం నాగుపాము ప్రత్యక్షమవడంతో ఒక్కసారిగా కలకలం రేగింది. సాయంత్రం సుమారు 7 గంటల సమయంలో కార్యాలయంలోకి నాగుపాము రావడంతో విధుల్లో ఉన్న తహసీల్దార్ నాగరాజు, కార్యాలయ సిబ్బంది భయాందోళనకు గురై బయటకు పరుగులు తీశారు. విషయం తెలుసుకున్న స్థానికులు వెంటనే అక్కడికి చేరుకుని నాగుపామును చంపివేయడంతో ప్రమాదం తప్పింది. అనంతరం అధికారులు, సిబ్బంది ఊపిరి పీల్చుకున్నారు. ఈ ఘటనతో కొద్దిసేపు తహసీల్దార్ కార్యాలయం వద్ద ఆందోళనకర పరిస్థితి నెలకొంది.