సొంతింటి భాగ్యం.. ఆత్మగౌరవ నివాసం: ఏపీలో లక్షలాది కుటుంబాల్లో వెలుగులు!

దిశ, వెబ్ డెస్క్: ఆంధ్రప్రదేశ్ రాష్ట్ర చరిత్రలో నిన్నటి రోజు (మార్చి 30) ఒక సువర్ణ అధ్యాయం గా నిలిచింది. ముఖ్యమంత్రి నారా చంద్రబాబు నాయుడు (Chief Minister Nara Chandrababu Naidu) పేట వేదికగా రాష్ట్ర వ్యాప్తంగా 2,50,893 గృహాల ప్రవేశోత్సవాన్ని అత్యంత వైభవంగా ప్రారంభించారు. కూటమి ప్రభుత్వం అధికారంలోకి వచ్చిన కేవలం 21 నెలల స్వల్ప కాలంలోనే అంతర్జాతీయ ప్రమాణాలతో మౌలిక సదుపాయాలు కల్పించి, మొత్తం 5.50 లక్షల ఇళ్లను పూర్తి చేసి లబ్ధిదారులకు అందించడం ఒక రికార్డుగా నిలిచింది. ఈ సందర్భంగా సీఎం మాట్లాడుతూ, నిరుపేదల కళ్లలో ఆనందం చూడటమే తన అదృష్టమని, రాష్ట్రంలో ఇల్లు లేని ప్రతి ఒక్కరికి సొంత ఇంటిని అందించే బాధ్యతను తానే స్వయంగా తీసుకుంటానని ఈ వేదికగా రాష్ట్ర ప్రజలకు భరోసా ఇచ్చారు.

అలాగే రాష్ట్రంలో పేదరికాన్ని ప్రజల భాగస్వామ్యంతోనే నిర్మూలించాలనే సంకల్పంతో చంద్రబాబు రూపొందించిన తన మానస పుత్రిక 'పీ-4' (జీరో పావర్టీ) వినూత్న కార్యక్రమం ఇప్పుడు ఒక సామాజిక విప్లవంలా మారుతోందని అన్నారు. ఈ పథకం ప్రవేశపెట్టి ఏడాది పూర్తయిన సందర్భంగా, ఇప్పటివరకు 10.39 లక్షల పేద కుటుంబాలకు సామాజిక అండ లభించిందని సీఎం వివరించారు. ఈ ప్రణాళికాబద్ధమైన కృషి వల్ల కేవలం ఏడాదిలోనే సుమారు 2.1 లక్షల కుటుంబాల ఆర్థిక స్థితిగతుల్లో విప్లవాత్మక మార్పులు వచ్చాయని ఆయన గణాంకాలతో సహా వెల్లడించారు. పేదలను కేవలం లబ్ధిదారులుగా చూడకుండా, వారిని పారిశ్రామికవేత్తలుగా ఎదిగేలా ప్రోత్సహించడమే ఈ కార్యక్రమ ముఖ్య ఉద్దేశమని ఆయన పేర్కొన్నారు.

గత వైఎస్సార్‌సీపీ ప్రభుత్వ పాలనపై సీఎం చంద్రబాబు ఈ సందర్భంగా తీవ్ర స్థాయిలో మండిపడ్డారు. 2019 నుంచి 2024 మధ్య కాలంలో రాష్ట్రంలో విధ్వంసం రాజ్యమేలిందని, టిడ్కో (TIDCO) ఇళ్ల నిర్మాణాన్ని అడ్డుకుని నిరుపేదల పొట్టగొట్టారని విమర్శించారు. గత పాలకులు చేసిన అవినీతి, అనాలోచిత నిర్ణయాల వల్ల రాష్ట్రం అప్పుల ఊబిలోకి కూరుకుపోయిందని, కేంద్రం ఇచ్చిన నిధులను కూడా ఇతర అవసరాలకు మళ్లించి వ్యవస్థను అస్తవ్యస్తం చేశారని ఆవేదన వ్యక్తం చేశారు. గతంలో నిలిపివేసిన 2.73 లక్షల ఇళ్ల నిర్మాణాలకు తిరిగి జీవం పోసి, అదనపు నిధులు కేటాయించి మౌలిక సదుపాయాలతో సహా ఇప్పుడు పూర్తి చేశామని గుర్తుచేశారు.

ముఖ్యంగా అన్నమయ్య జిల్లాలో మొదటి విడతలో చేపట్టిన ఇళ్ల నిర్మాణాలను, లబ్ధిదారులకు చేకూరిన ప్రయోజనాలను సీఎం ప్రత్యేకంగా ప్రస్తావించారు. డిజిటల్ విధానంలో అత్యంత పారదర్శకంగా లబ్ధిదారులను ఎంపిక చేశామని, వారికి గౌరవప్రదమైన జీవనాన్ని అందించడమే ప్రభుత్వ ప్రథమ ప్రాధాన్యత అని ఆయన పేర్కొన్నారు. కేవలం ఇళ్లు నిర్మించడమే కాకుండా ప్రతి ఇంటికి ట్యాప్ ద్వారా తాగునీరు, సోలార్ కరెంట్, గ్యాస్ పైప్‌లైన్ (PNG) వంటి అత్యాధునిక వసతులు కల్పించి, పేదల ఇళ్లను అంతర్జాతీయ ప్రమాణాలకు అనుగుణంగా తీర్చిదిద్దినట్లు వివరించారు.

భవిష్యత్తు ప్రణాళికలను వివరిస్తూ, రాబోయే రోజుల్లో మరో 4.50 లక్షల ఇళ్లను యుద్ధ ప్రాతిపదికన నిర్మిస్తామని సీఎం ప్రకటించారు. ఈ ఏడాది డిసెంబర్ నాటికి మొత్తం 10 లక్షల ఇళ్లను పూర్తి చేసి పేదలకు అప్పగించడమే లక్ష్యంగా ప్రభుత్వం పక్కా కార్యాచరణ రూపొందించిందని తెలిపారు. 2029 నాటికి ఆంధ్రప్రదేశ్‌లో ఇల్లు లేని నిరుపేద ఒక్కరు కూడా ఉండకూడదనే ధృడ సంకల్పంతో కూటమి ప్రభుత్వం పనిచేస్తోందని, ఆ దిశగా త్వరలోనే మరిన్ని గృహ నిర్మాణ ప్రాజెక్టులు పట్టాలెక్కనున్నాయని స్పష్టం చేశారు.

అభివృద్ధి మరియు సంక్షేమం రెండు కళ్లుగా తన ప్రభుత్వం ముందుకు సాగుతుందని సీఎం అన్నారు. నిరు పేదలకు ఇళ్లు కట్టించి ఇవ్వడం ద్వారా వారికి కేవలం ఒక నివాసం మాత్రమే కాకుండా, ఒక స్థిరమైన ఆస్తిని మరియు సమాజంలో ఆత్మగౌరవాన్ని కల్పించామని ఆయన సగర్వంగా ప్రకటించారు. గత ప్రభుత్వం చేసిన విధ్వంసాన్ని సరిదిద్దుతూ, రాష్ట్రాన్ని మళ్ళీ ప్రగతిపథంలోకి తీసుకువచ్చేందుకు రాత్రింబవళ్లు శ్రమిస్తున్నామని, ఇందులో ప్రజల భాగస్వామ్యం కూడా ఎంతో అవసరమని ఆయన పిలుపునిచ్చారు.

చివరగా, ప్రజల సహకారంతో రాష్ట్రాన్ని 'స్వర్ణాంధ్రప్రదేశ్'గా మార్చే వరకు విశ్రమించబోమని చంద్రబాబు నాయుడు పునరుద్ఘాటించారు. ప్రభుత్వం చేపట్టిన ఈ బృహత్తర గృహ నిర్మాణ కార్యక్రమం, పీ-4 పథకం పేదరిక నిర్మూలన దిశగా పడిన అత్యంత బలమైన అడుగులని ఆయన పేర్కొన్నారు. లబ్ధిదారులు ఈ ఇళ్లను శుభప్రదంగా వాడుకోవాలని, తమ పిల్లలను బాగా చదివించి ఉన్నత స్థితికి తీసుకురావాలని ఆకాంక్షిస్తూ ముఖ్యమంత్రి చంద్రబాబు నాయుడు తన ప్రసంగాన్ని ముగించారు.