వరి సాగు తగ్గించండి : తెలంగాణకు కేంద్రం కీలక సూచన

దిశ, వెబ్ డెస్క్ : దేశవ్యాప్తంగా అసాధారణ స్థాయిలో పెరుగుతున్న వరి నిల్వలు, మారుతున్న పర్యావరణ పరిస్థితులు, ఇతర పంటల సాగు గణనీయంగా తగ్గడం వంటివి దృష్టిలో ఉంచుకుని వరి సాగు విస్తీర్ణాన్ని క్రమంగా తగ్గించాలని కేంద్ర ప్రభుత్వం రాష్ట్రాలకు కీలక సూచన చేసింది. ముఖ్యంగా దక్షిణ భారతదేశంలో వరి ధాన్యం ఉత్పత్తికి ప్రధాన కేంద్రంగా మారిన తెలంగాణతో పాటు పంజాబ్, పశ్చిమ బెంగాల్, ఉత్తరప్రదేశ్, హర్యానా వంటి రాష్ట్రాలలో పంట మార్పిడి (Crop Diversification) విధానాన్ని విస్తృతంగా అమలు చేయాలని కేంద్రం మార్గదర్శకాలను జారీ చేసింది. దేశవ్యాప్తంగా సాగు అవుతున్న భూముల్లో ఏటా లక్షలాది ఎకరాలలో వరికి బదులుగా ప్రత్యామ్నాయ పంటలను ప్రోత్సహించడం ద్వారా పర్యావరణ సమతుల్యతను కాపాడటంతో పాటు, మార్కెట్‌లో డిమాండ్ ఉన్న ఇతర ఆహార ఉత్పత్తుల కొరతను తీర్చవచ్చని తెలిపింది.

ఐదేళ్ల టార్గెట్ 25 లక్షల ఎకరాలు

ఈ ప్రణాళికలో భాగంగా తెలంగాణ రాష్ట్రానికి రానున్న ఐదేళ్ల కాలానికి కేంద్ర ప్రభుత్వం ఒక భారీ టార్గెట్ నిర్దేశించింది. దీని ప్రకారం తెలంగాణలో ప్రతి ఏటా కనీసం 5 లక్షల ఎకరాల చొప్పున, రాబోయే ఐదేళ్లలో మొత్తం 25 లక్షల ఎకరాలలో వరి సాగు విస్తీర్ణాన్ని క్రమంగా తగ్గించాల్సి ఉంటుంది. గత కొన్నేళ్లుగా సాగునీటి వసతులు గణనీయంగా పెరగడంతో తెలంగాణలో వరి సాగు దాదాపు మూడు రెట్లు పెరిగి, రాష్ట్ర మొత్తం సాగు భూమిలో వరి వాటానే 60 శాతానికి చేరుకుంది. ఈ తరుణంలో కేంద్రం హఠాత్తుగా ఇంత పెద్ద మొత్తంలో సాగును తగ్గించాలని సూచించడం క్షేత్రస్థాయిలో ఉన్న లక్షలాది మంది రైతులకు, అలాగే రాష్ట్ర ప్రభుత్వానికి ఒక పెద్ద సవాలుగా మారింది.

దిగుమతుల తగ్గింపు కోసమేనా?

వరి సాగును ఇంతలా నియంత్రించడానికి కేంద్ర ప్రభుత్వం కేవలం నిల్వల సమస్యనే కాకుండా పర్యావరణ, ఆర్థికపరమైన బలమైన కారణాలను కూడా ప్రస్తావిస్తోంది. వరి పంటకు విపరీతంగా నీరు అవసరం కావడం వల్ల అనేక ప్రాంతాల్లో భూగర్భ జలాలు ప్రమాదకర స్థాయికి పడిపోతుండటం (Groundwater Depletion), అలాగే మోటార్ల ద్వారా నీటిని తోడటానికి భారీగా విద్యుత్ వినియోగం కావడం ప్రధాన సమస్యలుగా మారాయి. వీటికి తోడు, నీరు నిల్వ ఉండే వరి పొలాల నుండి వెలువడే ‘మిథేన్’ వాయువు వల్ల గ్లోబల్ వార్మింగ్ పెరిగి పర్యావరణం దెబ్బతింటోంది. మరోవైపు దేశీయంగా పప్పుధాన్యాలు (Pulses), నూనెగింజలు (Oil Seeds) కొరత కారణంగా ఏటా వేల కోట్ల రూపాయల విదేశీ మారకద్రవ్యాన్ని వెచ్చించి దిగుమతులు చేసుకోవాల్సి వస్తోంది. అందుకే వరిని తగ్గించి, ఆ స్థానంలో కంది, సోయాబీన్, పెసర, మినుము, జొన్నలు వంటి లాభదాయక పంటల వైపు రైతులను మళ్లించాలని కేంద్రం గట్టిగా పట్టుబడుతోంది.

ఇతర పంటలకు ప్రోత్సాహకాలు

కేంద్రం నుంచి వస్తున్న ఈ ఒత్తిడి నేపథ్యంలో రైతులు నష్టపోకుండా ఉండేందుకు ముందస్తు చర్యలు చేపట్టింది. ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయం (PJTSAU) ఇటీవల ప్రభుత్వానికి సమర్పించిన ప్రత్యేక నివేదిక ప్రకారం.. వరి సాగును తగ్గించి ప్రత్యామ్నాయ పంటల వైపు మారే రైతులకు ఆర్థిక భద్రత కల్పించేందుకు ఎకరానికి రూ. 8,000 నుండి రూ. 10,000 వరకు నేరుగా నగదు బదిలీ (DBT) రూపంలో ప్రోత్సాహకాన్ని (Incentive) అందించే ప్రతిపాదనను సీఎం రేవంత్ రెడ్డి ప్రభుత్వం తీవ్రంగా పరిశీలిస్తోంది. మొదటి ఏడాదిలో కొన్ని ఎంపిక చేసిన జిల్లాల్లో పైలట్ ప్రాజెక్ట్‌గా ప్రారంభించి, ఐదేళ్లలో దశలవారీగా ఈ 25 లక్షల ఎకరాల పంట మార్పిడి లక్ష్యాన్ని చేరుకోవాలని, తద్వారా మార్కెట్ హెచ్చుతగ్గుల నుండి రైతులకు రక్షణ కల్పించాలని రాష్ట్ర ప్రభుత్వం యోచిస్తోంది.