కూకట్‌పల్లి దోపిడీలో బిగ్ ట్విస్ట్.. రూ.10 నోటుతో రూ.21 కోట్ల హవాలా దందా!

దిశ, వెబ్ డెస్క్: కూకట్‌పల్లి హవాల డబ్బు (Money laundering) దోపిడి వ్యవహారంలో ఊహించని ట్విస్ట్ నెలకొంది. ఈ రోజు జరిగిన నగదు దోపిడీ కేసు (Robbery case)లో విచారణ జరుపుతున్న పోలీసులకు విస్తుపోయే నిజాలు వెల్లడయ్యాయి. తొలుత ఈ దోపిడీ సొమ్ము తక్కువ మొత్తంలో ఉంటుందని భావించినప్పటికీ, లోతైన విచారణలో అది ఏకంగా రూ.21 కోట్ల హవాలా నగదు అని తేలడంతో అధికారులు షాక్‌కు గురయ్యారు. ఈ నగదు బదిలీ ప్రక్రియ మొత్తం ఒక పక్కా సినిమా స్కెచ్‌ను తలపిస్తోంది. హవాలా ఏజెంట్లు ఒక వ్యాపారి వద్దకు వెళ్లి, ముందే నిర్ణయించుకున్న ఒక రూ.10 నోటును సీక్రెట్ కోడ్‌గా చూపించి ఈ భారీ మొత్తాన్ని వసూలు చేసినట్లు సమాచారం.

అయితే, ఈ డబ్బును డెస్టినేషన్ పాయింట్‌కు తరలిస్తుండగా దుండగులు పక్కా ప్లాన్‌తో దాడికి దిగారు. బాధితుల కళ్లలో కారం కొట్టి, క్షణాల్లో ఆ రూ.21 కోట్లను దోచుకెళ్లారు. ఈ వ్యవహారంలో పక్కా సమాచారం ఉన్న వ్యక్తులే ఈ దోపిడీకి పాల్పడి ఉంటారని పోలీసులు అనుమానిస్తున్నారు. హవాలా డబ్బు కావడం వల్ల బాధితులు మొదట ఫిర్యాదు చేయడానికి వెనుకాడారు, కానీ కేసు తీవ్రత దృష్ట్యా పోలీసులు సీసీటీవీ ఫుటేజీల ఆధారంగా దర్యాప్తును ముమ్మరం చేశారు. ఈ భారీ నెట్‌వర్క్ వెనుక ఉన్న సూత్రధారులను పట్టుకునేందుకు ప్రత్యేక బృందాలు రంగంలోకి దిగాయి.