అర్జున్ దాస్ సినిమాకు క్రేజీ టైటిల్ ఫిక్స్..క్యూరియాసిటీని పెంచుతున్న ఫస్ట్ లుక్ పోస్టర్

దిశ, సినిమా: ఖైదీ, మాస్టర్ సినిమాలతో తెలుగు ప్రేక్షకులకు చేరువైన విలక్షణ నటుడు అర్జున్ దాస్(Arjun Das), మలయాళ ముద్దుగుమ్మ అన్నా బెన్(Anna Ben) జంటగా నటిస్తున్న తాజా చిత్రానికి 'కాన్ సిటీ' (Con City) అనే ఆసక్తికరమైన టైటిల్‌ను ఖరారు చేశారు. ఈ సినిమా ఫస్ట్ లుక్ పోస్టర్‌ను స్టార్ డైరెక్టర్ లోకేష్ కనగరాజ్ సోషల్ మీడియా వేదికగా లాంచ్ చేస్తూ చిత్ర బృందానికి శుభాకాంక్షలు తెలిపారు. ఒక మధ్యతరగతి కుటుంబం ప్రయాణాన్ని ప్రతిబింబించేలా ఉన్న ఈ పోస్టర్ నెటిజన్లను విపరీతంగా ఆకట్టుకుంటోంది. పవర్ హౌస్ పిక్చర్స్ నిర్మాణంలో హరీష్ దురైరాజ్ ఈ చిత్రం ద్వారా దర్శకుడిగా పరిచయమవుతున్నారు.

గతంలో కార్తీక్ నరేన్ వంటి దర్శకుల వద్ద పనిచేసిన హరీష్, ఈ సినిమాను ఒక ఫ్యామిలీ ఎంటర్‌టైనర్‌గా, హృదయాన్ని తాకే భావోద్వేగాలతో తెరకెక్కిస్తున్నారు. ఈ చిత్రంలో కామెడీ స్టార్ యోగి బాబు, సీనియర్ నటి వడివుక్కరసి కీలక పాత్రల్లో నటిస్తుండగా, చైల్డ్ ఆర్టిస్ట్ అకిలన్ ఒక ముఖ్య పాత్ర పోషిస్తున్నారు. ఫస్ట్ లుక్ పోస్టర్‌లో అర్జున్ దాస్ ఆఫీస్ బ్యాక్‌ప్యాక్‌తో అన్నా బెన్ హ్యాండ్‌బ్యాగ్‌తో యోగి బాబు, వడివుక్కరసి ట్రావెల్ బ్యాగ్స్‌తో చిన్నారి అకిలన్ విజయాన్ని సూచించే ట్రోఫీని తీసుకెళ్లడం క్యురియాసిటీ పెంచింది. సీన్ రోల్డన్ సంగీతం అందిస్తున్న ఈ సినిమా షూటింగ్ ఇప్పటికే 80% పూర్తయింది. మంగళూరు, చెన్నై, ముంబై నగరాల్లో కీలక షెడ్యూల్స్ ముగించుకున్న ఈ చిత్రం, తమిళంతో పాటు తెలుగులోనూ ఒకేసారి భారీగా విడుదల కానుంది.