ఆపరేషన్ సిందూర్ స్ఫూర్తితో.. శత్రువుల గుండెల్లో వణుకు పుట్టించేలా రక్షణ బడ్జెట్!

దిశ, వెబ్ డెస్క్: కేంద్ర బడ్జెట్ 2026 ప్రజల ఆకాంక్షలకు అనుగుణంగా ఉందని, 2047 నాటికి 'వికసిత్ భారత్', ఆత్మ నిర్భరత సాధించడానికి ఇది బలమైన పునాది వేస్తుందని రక్షణ మంత్రి రాజ్‌నాథ్ సింగ్ (Defence Minister Rajnath Singh) కొనియాడారు. ఈ ఏడాది రక్షణ రంగానికి రికార్డు స్థాయిలో ₹7.85 లక్షల కోట్లు కేటాయించినట్లు ఆయన వెల్లడించారు. ముఖ్యంగా 'ఆపరేషన్ సిందూర్' సాధించిన చారిత్రాత్మక విజయం తర్వాత, దేశ రక్షణ వ్యవస్థను మరింత పటిష్టం చేయాలనే సంకల్పానికి ఈ బడ్జెట్ అద్దం పడుతోందని ఆయన అభిప్రాయపడ్డారు.

త్రివిధ దళాల ఆధునీకరణపై ఈ బడ్జెట్ ప్రధానంగా దృష్టి సారించిందని రాజ్‌నాథ్ సింగ్ పేర్కొన్నారు. సాయుధ దళాల మూలధన వ్యయం (Capital Expenditure) కోసం ₹2.19 లక్షల కోట్లు, ఆధునీకరణ ప్రక్రియ కోసం ప్రత్యేకంగా ₹1.85 లక్షల కోట్లు కేటాయించామని ఆయన తెలిపారు. ఈ కేటాయింపులు దేశ భద్రత, అభివృద్ధి మరియు స్వయం సమృద్ధి మధ్య సమతుల్యతను పెంచుతాయని, భారత సైనిక శక్తిని ప్రపంచ స్థాయికి తీసుకెళ్తాయని మంత్రి ధీమా వ్యక్తం చేశారు.