రాష్ట్రానికి 8 కొత్త రైళ్లు
హైదరాబాద్ నుండి దేశంలోని వివిధ ప్రాంతాలకు ఎనిమిది కొత్త వీక్లీ స్పెషల్ రైళ్లను మంజూరు చేస్తూ కేంద్రం ఆదేశాలు జారీ చేసింది.
దిశ, వెబ్ డెస్క్ : తెలంగాణ ప్రజలకు కేంద్రం గుడ్ న్యూస్ తెలిపింది. రాష్ట్రంలోని రైల్వే ప్రయాణికులకు మరింత మెరుగైన రవాణా సౌకర్యాలను కల్పించే దిశగా కేంద్ర రైల్వే మంత్రిత్వ శాఖ ఒక కీలక నిర్ణయం తీసుకుంది. హైదరాబాద్లోని కాచిగూడ, చర్లపల్లి, నాంపల్లి స్టేషన్ల నుండి దేశంలోని వివిధ ప్రాంతాలకు ఎనిమిది కొత్త వీక్లీ స్పెషల్ రైళ్లను మంజూరు చేస్తూ ఆదేశాలు జారీ చేసింది. ఈ నూతన సర్వీసులు ప్రయాణికుల రద్దీని తగ్గించడమే కాకుండా, దూరప్రాంతాలకు ప్రయాణించే వారికి ఎంతో సౌకర్యవంతంగా మారనున్నాయి. ఈ విషయాన్ని కేంద్ర మంత్రి కిషన్ రెడ్డి అధికారికంగా ధృవీకరిస్తూ, తెలంగాణలో రైల్వే నెట్వర్క్ను బలోపేతం చేసే క్రమంలో ఇది మరొక మైలురాయి అని పేర్కొన్నారు.
ఈ వారాంతపు ప్రత్యేక రైళ్లు కేవలం రాష్ట్రానికే పరిమితం కాకుండా, పొరుగు రాష్ట్రాలైన ఆంధ్రప్రదేశ్, ఒడిశా, రాజస్థాన్ వంటి రాష్ట్రాలకు కనెక్టివిటీని పెంచుతున్నాయి. తిరుపతి మరియు తిరుచానూరు వంటి ఆధ్యాత్మిక క్షేత్రాలతో పాటు, భువనేశ్వర్, జైపూర్, శ్రీ గంగానగర్ వంటి ముఖ్యమైన గమ్యస్థానాలకు ఈ రైళ్లు సర్వీసులను అందించనున్నాయి. తెలంగాణ అభివృద్ధిపై ప్రత్యేక దృష్టి సారించి, రాష్ట్రానికి అవసరమైన మౌలిక సదుపాయాలను అందిస్తున్న ప్రధాని నరేంద్ర మోదీకి, రైల్వే శాఖ మంత్రి అశ్వినీ వైష్ణవ్లకు కిషన్ రెడ్డి ఈ సందర్భంగా కృతజ్ఞతలు తెలియజేశారు.
