వెనుజులా భూకంపం.. 6 రోజుల తర్వాత శిథిలాల నుంచి బయటపడ్డ మూడేళ్ల మృత్యుంజయుడు

దిశ, వెబ్ డెస్క్ : మృత్యువుతో పోరాడి గెలిచాడా చిన్నారి.. ప్రకృతే విస్తుపోయేలా ఆరు రోజుల పాటు శిథిలాల కింద ప్రాణాలను అరచేతిలో పెట్టుకుని జీవించాడు. వెనిజులాను అతలాకుతలం చేసిన భారీ భూకంపాల విధ్వంసం మధ్య ఒక అద్భుతమైన ఘటన వెలుగుచూసింది. జూన్ 24న సంభవించిన రెండు వరుస భూకంపాల దాటికి కుప్పకూలిన ఒక భవన శిథిలాల కింద చిక్కుకున్న మూడేళ్ల బాలుడు.. దాదాపు 6 రోజుల తర్వాత సురక్షితంగా, ప్రాణాలతో బయటపడ్డాడు.

ఊపిరి బిగబట్టి.. ప్రాణాలు నిలిపి!

ఇక్కడి లా గ్వైరా ప్రాంతంలో రెస్క్యూ బృందాలు సహాయక చర్యల్లో భాగంగా ఒక కూలిన ఇంటి శిథిలాలను తొలగిస్తుండగా బాలుని ఆచూకీ లభ్యమైంది. శిథిలాలను జాగ్రత్తగా తొలగించి చిన్నారిని బయటకు తీసిన వెంటనే రెస్క్యూ టీమ్ సభ్యులు ఆనందంతో కేకలు వేస్తూ హర్షం వ్యక్తం చేశారు. బాలుడికి ప్రాథమిక చికిత్స అందించిన అనంతరం అత్యవసర సేవల కోసం సమీపంలోని ఆసుపత్రికి తరలించారు. ఆహారం, నీరు లేకుండా అంత చిన్న వయసులో ఆరు రోజులు మృత్యువుతో పోరాడిన ఆ బాలుడికి ఎలాంటి పెద్ద గాయాలు కాకపోవడం గమనార్హం. ప్రస్తుతం బాలుడి ఆరోగ్యం స్థిరంగా ఉన్నట్లు సమాచారం.

శ్మశానాన్ని తలపిస్తున్న ఉత్తర వెనిజులా

జూన్ 24న వెనిజులా ఉత్తర ప్రాంతాలను వణకించిన రెండు భారీ భూకంపాలు దేశ చరిత్రలోనే అత్యంత ఘోరమైన నష్టాన్ని మిగిల్చాయి. వేలాది ఇళ్లు, వాణిజ్య సముదాయాలు, ఆసుపత్రులు నేలమట్టమయ్యాయి. అధికారిక నివేదికల ప్రకారం.. ఈ విపత్తులో ఇప్పటివరకు 1,700 మందికి పైగా మరణించగా, 5,000 మందికి పైగా తీవ్రంగా గాయపడ్డారు. ఇంకా వేలాది మంది గల్లంతైనట్లు తెలుస్తోంది. విద్యుత్, కమ్యూనికేషన్ వ్యవస్థలు పూర్తిగా స్తంభించిపోవడంతో సహాయక చర్యలకు తీవ్ర అంతరాయం ఏర్పడుతోంది.చిగురిస్తున్న ఆశలుభూకంపం సంభవించిన 72 గంటల (Golden Hours) తర్వాత ఎవరైనా బతికే అవకాశాలు చాలా తక్కువగా ఉంటాయని నిపుణులు చెప్తుంటారు. కానీ, వెనిజులాలో జరుగుతున్న కొన్ని ఘటనలు రెస్క్యూ బృందాల్లో కొత్త ఉత్సాహాన్ని నింపుతున్నాయి. ఇంతకుముందే ఓ 11 ఏళ్ల బాలుడు, అలాగే 18 రోజుల పసిబిడ్డతో పాటు ఆమె తల్లి ప్రాణాలతో బయటపడగా.. ఇప్పుడు ఈ మూడేళ్ల చిన్నారి రెస్క్యూ కావడం స్థానికుల్లో ఆశలు రేకెత్తిస్తోంది. శిథిలాల కింద ఇంకా ఎవరైనా ప్రాణాలతో ఉన్నారేమోనన్న ఆశతో అంతర్జాతీయ బృందాలు రాత్రింబవళ్లు శ్రమిస్తున్నాయి.