పోలీసు సిబ్బంది సంక్షేమానికి అధిక ప్రాధాన్యం: రాచకొండ CP డీఎస్ చౌహాన్
దిశ, తెలంగాణ క్రైం బ్యూరో: చనిపోయిన పోలీసు కుటుంబాలకు వీలైనంత త్వరగా పెన్షన్అందేలా చూడటంతో పాటు ఉద్యోగం వచ్చే విధంగా చర్యలు తీసుకోవాలని రాచకొండ పోలీస్ కమిషనర్ డీఎస్ చౌహాన్ సూచించారు. రాచకొండ పోలీస్ కమిషనరేట్ పరిధిలో విధులు నిర్వర్తిస్తూ మరణించిన కుటుంబాలకు గురువారం కమిషనర్ భద్రత, ఎక్స్గ్రేషియా చెక్కులను తన కార్యాలయంలో అందచేశారు. అనంతరం వారి యోగక్షేమాల గురించి తెలుసుకున్నారు. వారితో ఆప్యాయంగా మాట్లాడుతూ ఎలాంటి సమస్య వచ్చినా నేనున్నానంటూ భరోసా కల్పించారు. పోచంపల్లి పోలీస్ స్టేషన్‌లో అసిస్టెంట్ సబ్ఇన్స్పెక్టర్‌గా పని చేస్తూ చనిపోయిన జాన్సన్ భార్య సునీతకు భద్రత నుంచి 7 లక్షల తొంభై తొమ్మిది వేలు, విడో ఫండ్‌గా పదివేలు, ఫ్లాగ్ఫండ్‌గా పదివేలు, కార్భస్ఫండ్‌గా యాభైవేల రూపాయల చెక్కులు అందచేశారు.
అదేవిధంగా మల్కాజిగిరి స్టేషన్‌లో కానిస్టేబుల్‌గా పనిచేస్తూ చనిపోయిన నరేష్కుమార్భార్య లక్ష్మీభాయికి భద్రత నుండి 3లక్షల తొంభై మూడువేలు, కూతురు పేరునా లక్షా 96వేలు, కుమారుని పేరునా లక్షా 96వేల రూపాయల చెక్కులను అందచేశారు. ఈ సందర్భంగా ఆయన మాట్లాడుతూ.. సిబ్బంది సంక్షేమానికి అధిక ప్రాధాన్యత ఉంటుందని చెప్పారు. ఇక, తొమ్మిది నెలలుగా పెండింగ్‌లో ఉన్న టీఏ బిల్లులను కమిషనర్క్లియర్చేయటంపై పోలీసు అధికారుల సంఘం కృతజ్ఞతలు తెలిపింది. ఈ కార్యక్రమంలో అదనపు డీసీపీ నర్మద, పోలీసు అధికారుల సంఘం అధ్యక్షుడు భద్రారెడ్డి తదితరులు పాల్గొన్నారు.
