‘ప్రాణాలు కాదు, పరిష్కారం కావాలి’.. ఆర్టీసీ కార్మికులకు విజయశాంతి పిలుపు
సమ్మె చేస్తున్న ఆర్టీసీ కార్మికులు తీవ్రమైన ఆందోళనతో, ఉద్వేగానికి గురై ఆత్మహత్య ప్రయత్నాలకు వెళ్ళటం అత్యంత బాధాకరం అని కాంగ్రెస్ ఎమ్మెల్సీ విజయశాంతి (రాములమ్మ) ఆవేదన వ్యక్తం చేశారు.
దిశ, డైనమిక్ బ్యూరో: సమ్మె చేస్తున్న ఆర్టీసీ కార్మికులు తీవ్రమైన ఆందోళనతో, ఉద్వేగానికి గురై ఆత్మహత్య ప్రయత్నాలకు వెళ్ళటం అత్యంత బాధాకరం అని సీనియర్ నటి, కాంగ్రెస్ ఎమ్మెల్సీ విజయశాంతి (రాములమ్మ) ఆవేదన వ్యక్తం చేశారు. ఈ మేరకు ఆమె గురువారం తన సోషల్ మీడియా ఖాతాల వేదికగా ఒక ప్రకటన విడుదల చేశారు. తెలంగాణ అమరులు తమ పోరాటాలతో తెలంగాణ సాధించుకున్నది తిరిగి సమస్యలతో ఆత్మబలిదానాల కోసం కాదు.. అని పేర్కొన్నారు. కార్మిక సోదరులారా, తెలంగాణ బిడ్డలైన మీలో ఏ ఒక్కరు ఈ విధమైన దుఃఖానికి గురైనా తెలంగాణ సమాజం మొత్తం కలతతో ఎంతైనా బాధపడతది.. దయచేసి ఏ ఒక్కరు ఏ విధమైన ఇటువంటి చర్యలకు పాల్పడవద్దని చేతులెత్తి మొక్కి చెబుతున్నాను.. అని పిలుపునిచ్చారు. ఆత్మాహుతికి పాల్పడ్డ నర్సంపేట సోదరుడు శంకర్ గౌడ్ కోలుకోవాలని భగవంతుడిని ప్రార్థించారు. ప్రభుత్వానికి తక్షణమే ఈ సమస్యను పరిష్కరించి, పరిస్థితిని చక్కదిద్దాల్సిన బాధ్యత ఉన్నదని విజయశాంతి తెలియజేశారు.
