ఉదారత చాటుకున్న మంత్రి పొంగులేటి శ్రీనివాస్.. బాలిక చదువుకు ఆర్థిక సహాయం

దిశ, ఖిలా వరంగల్: నగరంలోని నాని గార్డెన్స్ వేదికగా నిర్వహించిన “భూభారతి చట్టం - 2025” పై అవగాహన సదస్సు గురువారం ఉదయం ఘనంగా ప్రారంభమైంది. ఈ కార్యక్రమానికి హాజరైన రాష్ట్ర గృహ నిర్మాణ, రెవెన్యూ , సమాచార శాఖల మంత్రి పొంగులేటి శ్రీనివాస్ రెడ్డి తన సాధారణ శైలిలో కాకుండా, ప్రత్యేక దృష్టితో తన మనసును చాటుకున్నారు. సభ వేదిక వద్దకు చేరుకున్న మంత్రికి, అక్కడే వృద్ధావస్థలో కాగితం చేతిలో పట్టుకుని దిగులుగా నిలబడిన ఓ వృద్ధురాలు కనిపించింది. ఆమె దీనస్థితిని గమనించిన మంత్రి, వెంటనే వేదికపై నుంచే ఆమెను గౌరవంగా వేదికపైకి ఆహ్వానించారు. ఆప్యాయతతో “ఇక్కడికి ఎందుకు వచ్చావమ్మా?” అని అడిగారు.

ఆ వృద్ధురాలు తన మనోభావాలతో మాట్లాడుతూ.. “నా పేరు వేల్పుల ఊర్మిళ. నేను 41వ డివిజన్ శంభునిపేట ప్రాంతానికి చెందినదానిని. నా మనవరాలు వేల్పుల లిటి ఇటీవల 4వ తరగతి పూర్తి చేసి, సెయింట్ గాబ్రియల్ పాఠశాలలో 5వ తరగతిలో ప్రవేశానికి పరీక్ష రాసి సీటు కూడా సాధించింది. కానీ నా కుమార్తె దంపతులు మనస్పర్థల వల్ల విడిపోవడం జరిగింది. ఈ నేపథ్యంలో నా మనవరాలిని చదివించగల స్తోమత నాకు లేదు. అందుకే మీ వద్దకు వచ్చాను” అంటూ కన్నీళ్లతో మంత్రికి వివరించడంతో.. మంత్రి తక్షణమే స్పందించారు. ఆ చిన్నారి విద్యాభవిష్యత్తును మించిన కోరిక ఏముంటుందని భావించిన మంత్రి పొంగులేటి శ్రీనివాస్ రెడ్డి, లిటి చదువు కోసం అవసరమయ్యే అన్ని ఖర్చులను స్వయంగా భరించ겠నని ప్రకటించారు. ఇది విన్న వారందరూ అభినందనలతో స్పందించారు. వేదిక మీదే చిన్నారికి విద్యా మార్గం ఏర్పరచిన మంత్రిని పలువురు కొనియాడారు.